Paris Saint-Germain (PSG) chuan an star Kylian Mbappe thlaktu tur atan Manchester United star Anthony Martial chu an duh niin RMC Sport leh The Daily Mail in an tarlang.
Kum 2015 khan Man Utd chuan Ligue 1 club AS Monaco atang Anthony Martial hi an la lut a. Red Devils lama a insawn hnu hian hmasawnna tamtak a hmu, mahse, khelhna hun a neih tam vak tawh loh avangin chhuahsan mai a pawi tilo niin report in a tarlang.
Tun season khelh mekah Anthony Martial hian Man Utd tan minutes 359 chauh ala khel tling rih a. Old Trafford lamah first team tan khelhna hun a nei mang tawh lo, hei vang hian club a chhuahsan thuai dawn niin a lang.
Anthony Martial agent Philippe Lamboley chuan Martial chhuah tur chungchang a sawi, khelh tam theihna tur club a zawng hnai niin a sawi bawk.
“Anthony Martial hian January-ah Manchester United chhuahsan a duh. Khelh tam a mamawh. January thla pawh hi a awm duh tawh lo. Club lam pawh ka hrilh thuai ang.” tiin Lamboley chuan Sky Sports a hrilh.
Winter transfer window a inhawng leh tep tawh a, Europe ram hrang hrang atan Martial duhtu pawh an awm nual maithei. Report in a tarlan dan chuan Paris Saint-Germain chuan an forward Kylian Mbappe thlaktu tur atan an ngaihven niin a tarlang.
Hriat angin summer transfer hnuhnung ber atang khan Real Madrid leh Kylian Mbappe te hi sawi zawm an lo ni tawh a. Los Blancos lamin Mbappe hi an la lut a nih chuan Mauricio Pochettino hian Martial hi a la lut thut thei a ni.
Paris Saint-Germain chauh hi Martial duhtu club anni lova, report hi a rintlak a nih chuan Ligue 1 club Lyon pawhin Martial hi an duh ve a ni.
An sawi zel danah Lyoan hi chuan Martial hi winter transfer window inhawn hunah loan a lak luh an duh niin an sawi. Hei mai bakah European club lian FC Barcelona leh Juventus pawhin Martial dinhmun an ngaihven ve reng bawk.
Manchester United star Anthony Martial hian PSG forward Kylian Mbappe a thlak ang em?
Kum 2017 khan Kylian Mbappe chuan AS Monaco atangin Paris Saint Germain hi a zawm a. A zawm hnuah PSG player tha ber pakhat a ni. Mahse, Paris a chhuahsan hnai niin a lang.
Kylian Mbappe hian PSG ah thla 7 vel chauh contract a nei tawh a. Contract thar chungchang erawh ala lang rih lo.
Real Madrid lamin Mbappe hi nakum lamah chauh lak luh an tum tur thu an lo sawi tawh a. Summer transfer lai khan lak luh tum mahse, an la lut theilo, kum thar lamah khi chuan an lak luh ngei a rinawm.
Mbappe’an Real Madrid a zawm a nih phawt chuan Manchester United star Anthony Martial hi an lak luh mai a rinawm.
Source SK