Paris Saint Germain chuan an forward Kylian Mbappe chu €225 million in an hralh phal a, hetiang zata an hralhchhuak thei anih chuan PSG in 2017 a Barcelona atanga Neymar an lâkluhna man €222 million kha khum in football history a player man to ber record thar a siam ang.
Kar tlemtê liamta khan Mbappe mana PSG sum phut zat Real Madrid lamin an hre tawh a, chu chu €250 million a ni. Mbappe nu leh a agent ni bawk Faiza Lamary chuan Real Madrid hotute hnenah a fapa chungchang sawi puiin a transfer fee a PSG lam phut zat te thlengin a hrilh fai kel.
Marca chanchinbu tarlan danin Real Madrid chuan PSG in Mbappe man an tihniam deuh lo anih chuan an dawr loh tur thu an hrilh a, a player berin Real Madrid lo club dang zawm tumna a nei lo bawk nen, PSG lam chuan an forward kum 24 a upa man hi €250 million atangin €225 million ah an tla hniam.
Saudi Arabian club Al Hilal chuan Mbappe manah €300 million chu PSG hnenah an offer a, Ligue 1 champion pawhin an lo pawm ve mai bawk. Amaherawhchu a player berin Saudi lam pan a tum lo hulhual a, transfer chungchangah Al Hilal chu eng inbiakna mah neihpui duh lo. Al Hilal chuan France captain hi season khat chhungin bonus nen €700 million hlawh pêk an inhuam a, mahse hei hi UCL chawi duh Mbappe chuan a ngaituah chhin eih lo.
Hetiang anih avangin PSG lam pawhin an forward hi Real Madrid hnen chauha hralh theih a ni tih an hria a, an forward mana an lo chhiar tawh €250 million pawh tunah chuan an tihniam hret.
Los Blancos hian €225 million in Mbappe lâkluh an inhuam em tih chu zawhna, a chhanna la hriat loh a ni a, hetiang zata tam hian Santiago Bernabeu lam a pan anih chuan Mbappe hi khawvela player man to ber a ni ang.