Paris Saint Germain star Kylian Mbappe chu tun hnai maia an kawmna ah eng vanga PSG ah season khat bak cham tum tawh lo nge anih tih te leh PSG chu tun thlenga Champions league an chawi theihloh chhan te zawh a ni.
PSG hi tun hnai kum 5 vel chhung zet chu Champions League chawi tura rinkai ber te zînga mi niin 2020 khan a tumkhat nan final an lut hial a, amaherawhchu vanduaithlak takin final ah German champion Bayern Munich an ngam lo.
PSG in 2021 ah player hrawl tak tak an sign a, chung zingah chuan UEFA Champions League lo chawi nual tawh Lionel Messi leh Sergio Ramos te pawh an tel nghe nghe. Mahse Messi, Neymar leh Mbappe te khel ho pawhin PSG chu UCL an chawi pui thei lova, tun hnai season hnih liamta chhungin last 8 an hlangkai thei lo bawk.
Reporter in eng vanga PSG in tun thlenga UCL la chawi thei lo nge an nih tih zawhna Mbappe chuan hetiang hian a chhang, “Eng vangin PSG in UCL an chawi theihloh chhan ka hre bik lo. Heng zawhna hi chu team remtu, squad siamtu leh he club dintu te hi zawt zawk rawh u. Kei chuan ka hna ka thawk a, player tha ber lawmman ka dawn bakah a zawnin season 5 chhung Ligue 1 ah top scorer ka ni bawk. Min seltute awka atang phei chuan kha aia la ti tha thei ka ni. Chuvang chuan heng hi ka tana zawhna lian tak a ni lova, club hotu lu lam chhan tur a ni zawk. Paris hi hlawhtlinna ropui chang turin ka puih em em pawhin ka hre lova, a chhan chu PSG hi team inlungrual lo leh club inthen hrang an nih avangin. Hetianga tawngkam ka neih avang hian sel pawh ka tawk ngei dawn a , mahse chu chuan min tibuai dawn lo. A chhan chu ka thiltih leh ka tihdan te ka hriatchian vang a ni” a ti.
Mbappe hian season hmasa khan PSG tan inelna hrang hrangah goal 41 leh assist vawi 10 a thawkchhuak a, team player thawhhlawk ber a ni kan ti thei âwm e.
Kum 24 a upa hian PSG ah eng vanga season khat bak cham tum tawh lo nge a nih tih sawi leh in, “Ligue 1 a ka season hman hnuhnung ber tur anih ka rin chhan maw? Ho te mawle, inel duh mi ka ni a, ka inkhelh chuan hnehna chan ngei ka duh thin. Tunge ka khelhpuite, eng kawr nge ka hak tih leh khawnge ka khelh tih lam a pawimawh lo. Khawiah mah hian ka cheng lova, ka awmna hmun apiangah chak ka duh a ni mai. Ka lungawi ngai dawn lova, Champions League chawi hi ka duh a ni. Ka insiam tha leh ang a, chawlh nuam tak ka hman chhung hian ka thahrui leh chakna te ka khawl anga, chak duha tuihal leh riltamna nasa zawk nen ka lo kir ang.”
Mbappe hian PSG ah contract thar ziah a tum tawh lova, PSG hotute chuan contract thar a ziah loh chuan kuminah hralhchhuah ngei an tum dawn. France star hian PSG ah season thar a hmang tawh lo maithei a, Premier League club lian te nena sawizawm ni ve bawk mahse Spanish club Real Madrid chu a kalna âwm ber a ni mêk.