Paris Saint Germain sporting director hlui Leonardo chuan Kylian Mbappe chu a mizia that tawk loh avanga team kaihruai thei tur player anih loh thu a sawi a, tun nipui bazar hian Paris khawpui chhuahsan ngei se a duh bawk.
Mbappe hian club hotute hnenah a contract neihlai a pawhsei loh tur thu a hrilh a, he thu hi PSG lamin an hriat rualin club president Nasser Al Khelaifi chuan France star chu tun thla ral hma ngei a contract a pawhsei loh chuan an hralhchhuah tur thu a sawi chiang.
Nikum nipui bazar laiin Real Madrid leh Mbappe te sawizawm an hlawh viau a, a tawpah erawh kum 24 upa hian Parc des Princes ah kum 2 dang daih tur contract thar a ziak ta thung. Kumin nipui bazar a lo inherchhuak leh a Mbappe hma hun tur chiang lo ruai karah Los Blancos lam nen sawizawm an hlawh leh a, chutihrualin Spanish club hian Mbappe hi official takin an dawr lo.
PSG President Al Khelaifi chuan Mbappe chu a thlawna an chhuah phal loh thu leh contract thar a ziah loh chuan kuminah an hralhchhuah tur thu a sawi a, PSG sporting director hlui Leonardo pawhin Mbappe lakah ngaihdan a sawi.
Leonardo chuan, “Kylian Mbappe awm hma pawhin Paris Saint Germain hi a awm tawh a, a awm loh hnu pawhin a awm zel ang. Paris ah kum 6 chhung a awm tawh a, heng kum 6 chhung hian Champions League chawi thei team panga (Real Madrid, Liverpool, Bayern Munich, Chelsea leh Manchester City) te an awm. Heng team panga te hian Mbappe a an kawl lo vek a, chumi awmzia chu Mbappe tel lo hian UCL a chawi theih lutuk tihna a ni.”
PSG Sporting director hlui chuan sawi chhunzawmin, “Tun hnai kum 2 liamta chhunga a mizia hian team tana hruaitu tha a la nih loh zia a lantir. Player ropui tak chu a ni ngei a, mahse hruaitu tha tak erawh a nilo. Goal khungtu ropui tak a ni ngei a, goal chance siamchhuak thei tha tak erawh a nilo. A kianga khel tur team din hi a harsa viau in ka ring. PSG tana a that zawk nan engpawh thleng dawn se Mbappe hi a chhuah a hun tawh in ka hria” a ti.