Kylian Mbappe chuan Paris Saint Germain chhuahsana club dang a zawm anih pawh in contract mawm tak a phut dawn a, club lian na zawng tan France captain hi han beisei chi zia zang a nilo ang.
Nikum nipui transfer bazar ang in kumin nipui bazarah pawh Kylian Mbappe chungchangah thawm thang va a tam leh em em a, kum 24 a upa hi Real Madrid nena sawizawm mek niin Premier League club lian thenkhat te pawh in an ngaihven mek a ni.
Marca chanchinbu tarlan danin Mbappe hian kumin nipui bazarah club a chhuahsan chuan kumkhat chhunga a hlawh phut tur zat chu €240 million a ni! Mbappe hi Liverpool nena sawizawm anni a, amaherawhchu Reds in khitiang zata tam player pakhat hlawh ah chuan an inseng lo tawp ang!
Mbappe leh Real Madrid te chu nikum nipui bazar lai khan sawizawm an hlawh hle a, 2022 FiFA World Cup golden boot winner hian Santiago Bernabeu lam a pan teuh hle nghe nghe anih kha. Amaherawhchu PSG lam contract offer a mawm em em a, France President meuh in PSG a cham turin a fuih bawk nen, Mbappe chuan hnial harsa tiin Parc des Princes ah kum 2024 June thla thleng daih tur contract a ziak ta zawk a ni. A contract hi thla 12 dang pawhsei theih a ni nghe nghe bawk.
2023 nipui bazar a lo inherchhuak a, France star hian PSG hotute hnenah a contract thla 12 dang pawhsei theih chu a pawhsei loh tur thu a hrilh chiang. Hetiang anih takah chuan Monaco forward hlui hian PSG ah season khat bak contract a nei tawh lo tihna a ni.
PSG lam chuan an forward hi nakkumah a thlawna chan ai chuan kuminah hralhchhuah mai an duh a, Real lamin erawh Mbappe chu nakkumah a thlawna lakluh an duh thung.
Los Blancos hian Borussia Dortmund atangin Jude Bellingham chu €130 million in an sign a, Espanyol atangin Spanish striker Joselu chu loan in season khat tan an hawh bawk. Kum 33 a upa hian season hmasa khan league goal 16 leh assist vawi 2 neiin league goal khung tam lamah Lewandowski leh Karim Benzema te chiah a phak lo.