Kan hriat angin heng centre back 3 Virgil van Dijk, William Saliba leh Ruben Dias te hi Premiere League centre back tha ber pawl anni a, Liverpool, Arsenal leh Manchester City tan an khel mek a ni.
Kum 2018 khan Van Dijk chuan Southampton atangin Liverpool chu £75 million lai maiin a zawm anih kha, Liverpool a rawn zawm hnu hian a che tha nghal hle a, khawvel defender tha ber pakhatah a rawn inchhuah.
Summer transfer hnuhnung berah khan Liverpool captain hlui Jordan Henderson’an club a chhuahsan tak avangin club captain atan Van Dijk chu ruat a ni.
Chutiang bawkin kum 2019 khan William Saliba chuan Arsenal a zawm ve bawk, khatihlai khan teenager chauh a la ni a, experience neih nan kum 3 chhung teh meuh mai loan in hmun dangah a khel a. Saint-Etienne, Nice leh Marseille lamah te a khelh kual hnuin, Emirates Stadium lamah rawn kir lehin first team player pawimawh tak a rawn ni chho a ni.
Kum 2020 khan Ruben Dias chuan Benfica chhuahsanin Man City a rawn zawm ve bawk. City a zawm hnu atanga vawiin ni thlengin City player pawimawh tak pakhat a ni mek.
Opta Perfomance Index te chuan Squawka kal tlangin heng centre back pathum te hi an khaikhin a, Premiere League match 12 an khelh tawh atangin stats hi an la a ni. A hnuaia kan tarlang ang hi an stats chu a ni e.
Van Dijk hi a che tha fal deuh hlek a, ball recoveries, forward passed leh ground duels won-ah erawh Saliba a chungnung thung. Van Dijk hi kum 32 a upa ni tawhin Saliba erawh kum 22 chauh la niin, an inkarah kum 10 lai mai a tla a ni.
Hetihlai hian Ruben Dias erawh beisei angin a che tha love, eng category-ah mah Van Dijk leh Saliba hi a khum lo, Opta Performance Index-ah erawh 81 a hmu.