Premier League hmel thar kan hmu dawn em?

Mizo Football

Liverpool leh Manchester United hmalakna hmanga Premier League hmel thlak danglam tumna chuan thawm a neih chhunzawm zel a, Premier League, UK sorkar leh supporters’ group-te chuan an duh lohna thu ual au takin an sawi tawh!

Hetihrual hian English Football League lam chuan he hmalakna hi an thlawp thu an sawi thung a, division hniam lam tana hamṭhatna tur tam tak awm a nih avangin EFL-in an thlawp hi a mak hran lo.

Chutihrual chuan Premier League a club tam zawkin an tawrh theih thil a ni tel bawk a, hei vang tak hian top flight hotute leh fans lam thlawpna hi a hmu tel lo niin a lang.

Mahse, English football a club lian fal pahnih hmalakna a nih avangin he hmalakna hi en liam mai erawh harsa tak a ni a, “Ruahmanna chu eng ang tak nge a nih?” tih chu mipui thinlunga zawhna awm chu a ni.

20 aṭangin 18

Project Big Picture a an ruahmanna langsar tak pakhat chu Premier League a team 20 awm chu 18 a tihhniam a ni a, hei hi English top flight club lian ni lo tan chuan thlawp a harsa.

Mahse, he ruahmanna hi Premier League a inkhel tam lutuk tih tlem nana rawt a ni a, player-te an hahdam deuh tawh dawn avangin national team puihna remchang tak a ni bawk ang.

Kum 1992 a Premier League din a nih hma khan top flight club hi 18 a tih tlem duhna a lo ri fo tawh a, Football Association chuan an national team hmakhua ngaihtuah ran chungin an lo thlawp fo tawh bawk.

He ruahmanna hi a hlawhtling a nih chuan Premier League club-te hian season khatah match liin an khel tlem dawn tihna a ni a, Championship, League One leh League Two-ten dan pangngaiin club 24 ṭheuh an neih chhunzawm ang – mahse, English football a professional club chu 92 aṭanga 90 a nih dawn tak avangin League Two club pahnih chu National League lamah an tlak a ngai dawn thung.

Mangṭha League Cup!

Ruahmanna langsar tak pakhat zingah chuan Community Shield leh League Cup tihtawp a awm – he inelnaa nomawi lo chawi hnem tawhte tan hmai uanna tur a tlem sawt dawn tihna a ni.

1960-61 season aṭanga khelh ṭan League Cup-ah hian Liverpool chu champion ngun ber an ni a,  vawi riat an champion tawh – hetihlai hian titawp kher loa kalpui dan tur ruahmanna a awm nia sawi a ni bawk.

League Cup hi tihtawp ni loa kaltlangpui tho a nih chuan European football khel lo club-ten an khel thung ang – Champions League leh Europa League khel club-ten match an nei tlem sawt dawn tihna a ni.

Premier League club lianten player enchhin nana an hman inelnaa champion hian Europa League an khel thei a, club tenau tan chuan sum lakluh belhna remchang tak a ni bawk.

Promotion & relegation

Premier League-ah club 18 an inel chuan a hnuai lam pahnih chu Championship a tla thla chiang tur an ni a, mahse 16-na chuan league khelh chhunzawmna chance la neiin playoff tournament an hmachhawn ang.

Tunah chuan Premier League aṭangin club pathum an tla ṭhin a, Championship aṭangin a sang pahnih chu a tling chiang an ni a, pathumna aṭanga parukna team ten playoff tournament an khel ṭhin.

Ruahmanna thar hi hman a nih chuan Championship table a pathumna aṭanga pangana leh Premier League a 16-na ten playoff an khel tawh ang a, English second division a paruknain chance an nei ve tawh dawn lo tihna a ni.

He dan hi 1986-87 leh 1987-88 season khan hman a lo ni tawh a, mahse First Division team 22 ni ṭhin chu 20 a tih tlem a nih takah khan hman chhunzawm a ni lo – he dan hi Bundesliga chuan an kalpui mek.

Sum leh pai

Premier League leh EFL club-te sum lakluh hi kum 1992 hnu khan awihawm loh khawpin a intam hleih a, hei hi television lama chhuahna man aṭanga sum hmuh a intam hleih vang a ni ber.

Mahse, dan tharah chuan Covid-19 vanga sum tam tak chan, club tenau zawk, EFL club-te chuan Premier League aṭangin puihna pound maktaduai 250 an dawng ang a, parachute payment chu tihtawp tur a ni thung.

Parachute payment hi Premier League aṭanga tla, club pathum puihna a ni a, English top flight aṭanga club pathumte hi Premier League chuan sum lama an buai thut loh nan kum thum chhung ( Premier League-ah an let a nih loh chuan) sumin a pui ṭhin a ni.

Hei mai hi a ni lo – television aṭanga Premier League club-te sum hmuh 25% chu EFL club-ten an insem ve bawk dawn. Hetia thlir mai chuan ruahmanna hi EFL club tan chuan pawm loh chi a ni lo.

Roreltu thar

Ruahmannaa sawisel hlawh lai ber chu Premier League a club ten thu an neih theih dan tur lai hi a ni – tun dinhmunah chuan English top flight-ah hian club tinin thuneihna inang an nei vek a, thu an pass dawn reng rengin club 14-in an pawm zel a ngai.

Mahse, tuna ruahmanna tharah chuan ‘special voting rights’ chu Premier League a hun an hman rei tawh dan aṭanga tehin club pakuain an nei dawn a, ‘Big Six’ tia hming lem an pek Liverpool, Manchester United, Manchester City, Arsenal, Chelsea leh Tottenham Hotspur bakah Everton, Southampton leh West Ham-te an ni.

Hetiang a nih chuan club lian zual pangate hian broadcast contract, financial rules leh club neitu thar awm chungchang thlengin thu an nei dawn tihna a ni a, Premier League club dang tan duh chi a ni lo.

Hetihlai hian club pakua hian he ruahmanna hi an pawm vek lo nia sawi a ni a, West Ham chuan thunei tur zingah dah ni mah se ual au takin he ruahmanna thar hi an pawm loh thu an sawi tawh.

Ruahmanna chu

Sum harsatna tawk mek EFL club-te chu pound maktaduai 250 pek tur an ni.

Premier League a awm rei tawh club pakua tan special voting rights a awm ang a, Premier League a thil thlak danglam turin anni zinga club paruk remtih tlanna hi a tawk ang.

Premier League club 20 chu 18-ah tihhniam tur a ni.

FA-in sum an hlohte puihna turin pound maktaduai 100 pek tur a ni.

Premier League sum lakluh 8.5% chu league inenkawlna leh FA hnuaia ruahmanna ṭha zawkte atan hman tur a ni.

Chhiah pek hmaa Premier League sum lakluh 6% chu English top four division a stadium thuam ṭhat nana hman tur a ni a, seat pakhat siam nana £100 hman zel tur anga chhut tur a ni.

Premier League-in television aṭanga a sum hmuhte sem danah ruahmanna thar siam a ni ang.

League Cup leh Community Shield chu tihtawp tur a ni.

Championship, League One leh League Two-in club 24 ṭheuh an nei dawn a, professional club 92 ṭhin chu 90 a ni dawn tihna a ni.

Premier League club 18 aṭangin a hnuai lam pahnih chu Championship a tla thla chiang tur an ni a, mahse 16-na chuan Championship club pathum nen playoff tournament an hmachhawn ang.

Championship table a pakhatna leh pahnihna chu automatic a Premier League khel tura tling tur an ni a, pathumna, palina leh pangana ten Premier League 16-na nen playoff an khel ang.

Premier League leh FA thuneihna ni loa Women’s Professional league a hranpaa kalpui.

UEFA dan zulzuiin Financial fair play regulations kalpui a ni ang a, Premier League executive ten club sum hman dan zalen takin an en thei ang.

Fan-te tan khualmuala inkhel en man chu £20 ni se, khualmuala fan-te zinna puih ni se, fan-te ṭhutna him zawkna tur ngaihtuah a, khualmuala inkhel reng rengah away fans tan 8% seat a tlem berah hauh tur.

Pre-season friendly tam zawk khelh a nih theih nan August thla tawp lamah Premier League khelh ṭan tur.

Loan a player chhuahtir danah dan thar siam a ni ang.