Arsenal in club transfer record meuha Declan Rice leh player dangte an lâkluh hnuin Gunners manager hlui Arsene Wenger chuan Mikel Arteta team chu season thara Premier League title chawi thei tur an nih thu a sawi.
Arsenal in uiawm takin season hmasa an khar a, ni 248 teh meuh table chung ber luah mahse season tawp lamah beisei an phâk lova, Manchester City kut ata league title an lâk sak thei lo. Nipui bazar a lo inherchhuak a, Gunners hotute’n Mikel Arteta lakah rinna an nghat ngam tih a hriat a, squad thawmthat nan sum tam tak an hman tir.
Mikel Arteta an a duh ang player a chawlut nghauh nghauh a, Kai Havertz, Jurrien Timber leh Declan Rice te chuan Emirates Stadium pan fel tawhin player pathumte mana Gunners insen zat chu £210 million a ni hem mai!
A bikin Declan Rice transfer in thawm a nei lian hle a, Arsenal in hun rei tak chhung an lo awh tawh kum 24 a upa English midfielder hian Mikel Arteta team chu rahbi thar a kaipui ngei a rinawm.
Gunners in £210million sêng a Rice, Havertz leh Timber te an lâkluh hnuin Arsene Wenger chuan a team hlui Arsenal chu league title chawi tura an dinhmun a that thu hetiang hian a sawi, ”Investment tha tak a ni in ka hria a, A vaia thlirin signing tha tak anni hlawm. Kum 23 leh 24 te anni a, an kum lam la naupang mahse an rilru erawh a puitling zân tawh a, kum engemaw zah chhung chu an khel ho thei dawn a ni.
“Nikum lam aiin pressure a tam tawh zawk ngei ang a, amaherawhchu thil tam tak an lo zirchhuah tawh avangin an lakah pressure te hi tha taka an hmachhawn theih ka ring a ni. Championship (Premier League) kan chawi tawh ngei ka beisei a, Arsenal team lakah hian rinhlehna ka nei tawh mang lo” a ti.
Mikel Arteta leh a nau te’n season thar atan inbuatsaihna an kal chho pui mawp mawp tawh a, July ni 19 khian MLS All Star XI an hmachhawn dawn a, chumi hnuah Manchester United, Barcelona leh Monaco te nen an la innuai bawk ang.