Napoli striker Victor Osimhen chuan khawvela league harsa leh tha bera ngaih Premier League a inkhelh a châk tawh hle a, English top flight league a inkhel turin theihtawp a tan a lak thin thu a sawi.
Kum 24 a upa hian 2020 khan €70 million in Napoli a zawm a, hma sawn chho zel in a career a season duhawm ber a hmang mêk.
Nigerian forward hian season kal mêk ah Napoli tan goal 21 (all competition) a khung tawh a, a team chu league table chung ber a luahpui mêk bawk. A chet that em avangin European club lian dangte awhrawn a ni a, nipui transfer bazar inhawn hunah Osimhen hian club thar a nei tawh mahna le.
Osimhen hian tun hnai mai khan a hma hun zel tur chungchangah hetiang hian thu a thlah, “Khawvela league tha ber pakhat Italian league Serie-A a ka inkhel thei hi ka lawm hle a, nuam pawh ka ti takzet. Mi tam zawkin Premier League hi khawvela league harsa leh tha ber niin an chhal a, keipawhin ka lo suangtuah thin engtik ni ah emaw Premier League a ka inkhelh ve theih nan theihtawpin tan ka la zel. A pawimawh ber erawh nitin hmasawn a, ka form chhawmnung zel hi a ni” a ti.
Osimhen hian tun season ah Napoli tan game 26 (all competition) a inlan atangin goal 21 a khung tawh a, goal a khung tam ber tum season a ni dêr tawh. Premier League club lian Manchester United nen sawizawm an hlawh hle a, Erik Ten Hag mi duh nia sawi a ni bawk.
Napoli manager Luciano Spalletti nau te hi Serie A table ah point 15 laiin hma an hruai fal tawh a, league title an chawi ngei pawh a rinawm. Champions League lamah Round of 16 1st leg an khel tawh bawk a, German club Eintracht Frankfurt lakah sihnih faiin hma an hruai phawt.
