Pre season training tura lokir Man Utd player zingah Greenwood a tel ve lo

Pre season training tura lokir Manchester United player zingah Mason Greenwood a tel ve lova, chutihrualin Erik Ten Hag chuan kum 21 a upa hi thawhdun pui a duh nia report a ni.

Manchester United tana Greenwood inlan hnuhnun ber tum chu January 2022 daih tawh kha a ni a, pawngsual thubuai avangin Man Utd chuan tun thlengin inkhelh an la phalsak rih lo anih hi.

Greenwood laka thubuai (charges) te erawh tunah chuah thauhthlak anni tawh a, English international hi club lamin an la chhuzui mek a, club tana inlan an phalsak dawn em tih chiang lo ruai karah loan a club dang zawm tura ngaih a ni ve mek bawk.

Greenwood chungchangah Man Utd chuan July thla ral hma ngei hian thutlukna tawp an siam dawn a, 2023-24 season Man Utd squad list ah tel ve bawk mahse pre season training zawm an la phalsak loh danah a chungchangah thutlukna fel tak an la siam lo tih a hriat theih bawk.

Kum 21 a upa hi Turkey lam bakah Serie-A club atangin sawmtu a nei a, AS Roma boss Jose Mourinho chuan English international hi loan emaw a ngheta lakluh a duh nia report a ni.

Greenwood hian Old Trafford ah June 2025 thleng daih tur contract a la nei a, club dang amah lakluh tum awm nual mahse Red Devils chuan an player beiseiawm hi hralhchhuah mai an la phal bik lova, a chhuak dawn anih pawhin loan a chhuahtir chu an duhdan a ni.

Athletic tarlan danin Erik Ten Hag chuan Greenwood hi thawhpui a duh a, chutihrualin club tana inlan leh turin manager thutlukna ringawt a tawk lo deuh.

Man Utd chief executive Richard Arnold, co owner Joel Glazer te bakah United hotu thenkhat te’n Greenwood case hi an ngaituah chiang dawn a, a chungchangah thutl├╗kna fel tak an siam thuai ang.