Japan a pre season tour nei tur Paris Saint Germain squad ah French forward Kylian Mbappe chu club hotute’n an telh ve lo!
Mbappe hian PSG ah contract thar a ziah loh tur thu a sawi chiang a, club lam chuan nakkumah a thlawna chân an duh loh avangin a chungchangah thutlûkna fel tak an siam tawh.
PSG chuan kum 24 a upa Ligue 1 top scorer hi season thara club ruahmanna ah an telh lova, kuminah hralhchhuah ngei an tum ang.
L’Equipe tarlan danin Mbappe hian Real Madrid nen a ruka inremsiamna an lo nei diam tawh ni ngeiin PSG lam chuan an ring a, chu chu nakkumah a thlawna Santiago Bernabeu lam pan a ni.
PSG President Nasser Al Khelaifi chuan Mbappe an contract thar a ziah loh chuan hralhchhuah anih tur thu a lo sawi tawh a, Mbappe hian a thu sût a tum lo nen, kumin nipui bazar zet zawng Mbappe leh club hotute inkar boruak a fuh lo chho hle!
Real Madrid chu Mbappe kal duhna awmchhun niin a lang a, amaherawhchu Los Blancos hian Mbappe mana PSG sum phut zat nia an sawi €200 million theh chhuah an tum loh hmel sia! Nikum lamah Mbappe lâkluh tumin tan nasa tak khawh mahse kuminah erawh Mbappe chungchangah thawm an nei lo hle a, tun thlengin official bid an la theh lut lo.
Heng zawng zawng avang hian PSG lam pawh an forward hi chhuak tura an tur emaw vau deuh a ngai maithei a, a man tura an bituk zat pawh an tihhniam deuh a tul mahna!
Mbappe chân thei dinhmuna ding Paris Saint Germain chuan forward thar an melh mêk a, Juventus striker Dusan Vlahovic leh Manchester City midfielder leh forward ni kawp Bernardo Silva te chu tuna an top target te anni.
