Chelsea boss Graham Potter chuan tun dinhmuna Chelsea in beisei an phak loh chhan nia a ngaih chu manager hlui Thomas Tuchel enkawlna hnuaia pre season duhawm lo tak an hmang vang anih maithei thu a sawichhuak.
A zawna Premier League game 4 chhung chakni hmel hmu tawh lo Chelsea hian an league game leh ah Tottenham Hotspur an hmachhawn dawn a, game awlsam tak a ni dawn lo. Blues hi point 31 nen league table ah 10-na anni mek a, season thara UEFA Champions League khel turin an hmabak a ko takzet.
English manager Graham Potter chuan Chelsea in tun season a beisei an phak loh chhan nia a ngaihdan hetiang hian a sawichhuak,”Kan dinhmun tawn mek hi a harsa takzet a, Chelsea enkawl hi football a hna harsa ber anih thu ka lo sawi tawh anih kha, chu chuan chhan pawh a nei ngei e.”
”He club a hun rei zawk lo khawsa tawh player thenkhat te ka titi pui a, anni chuan pre season tour duhawm lo ber an hman thu min hrilh. An tour kha player te’n an beisei ang in an hmang tha lem lo. Khatih hunah khan he hmunah ka awm lova, chuvangin sawi theih erawh ka nei lo thung.’
”Hma kan sawn chho viau in kan hria a, amaherawhchu Southampton laka kan khelhdan erawh a chhe lulai hle. Kan tan vanpui a chim a ni hawt. Kan result avang hian mite sawiselna pawh kan pawm a, amaherawhchu he hmunah hian kan rilru puthmang a dik a, kan inzah tawn in hma lam pan kan tum ran a ni.”
