Manchester United manager Erik Ten Hag chuan nipui transfer bazar lam a tinzawn tan dêr tawh a, club chuan neitu thar pawh nei se squad thawmtha tura player tha tak tak lâkluh a tum dawn.
Man Utd hian an game hnuhnung berah Leeds United chu Old Trafford ah 2-2 in an inhnehtawk pui a, tun hnai chho ah rawn form viau mahse champion tur êm a rin ngam erawh an la nilo deuh.
Ten Hag chuan trophy liantham chawi turin a team enkawl mêk chu tha tawk ah a la ruat lova, position tina world class player kawl a duh.
“Manchester United hi siamthar leh kan duh chuan hmun tina top class player kawl a pawimawh a, chu mai bakah a thlawptu thlenga an that a ngai, a chhan chu inelna hrang hranga che that kan duh vang a ni” tiin Ten Hag chuan a sawichhuak.
“Kan game hnuhnung ber kha in hria a nga, position thenkhat ah kan la that tawk loh zia a lang. A sang ber thleng tur chuan kha kha a tawk lova, he hmunah hian team siamtha tura awm ka nih ang in player lâkluh kawngah pawh mawhphurna ka nei. Club board leh management lam nen pawh kan inbe fo va, ka duh erawh he club thil tum hlenchhuah niin sum enkawl lam a nilo.”
Red Devils hian tun season ah league game 22 an khelh atanga point 43 hlawhchhuak tawh in table ah 3-na anni mêk a, zanin hian kar hmasa lama an inhnehtawk pui Leeds United chu Elland Road ah an hmachhawn ang.
Tin, Man Utd neitu Glazers family chuan club hi an zuar mek a, a manah pawh £5 billion an chhiar nia sawi a ni. Sir Jim Ratcliffe, USA lam emaw Qatar lama business neitute chu Man Utd lei tur âwm mi anni bawk.