Arsenal player thar ni mai tur Declan Rice chu Portugal ah Portuguese star Raphael Leao, Bruno Fernandes leh Joao Cancelo te nena an train ho lai hmuh a ni.
England international Rice hian season hman zawh takah khan West Ham chu Europa Conference League a chawipui a, season tharah chuan Gunners kawr ha in a inkhel tawh ang. Rice transfer fee ah Gunners leh Hammers te chu £105 million in an inrem fel a, British player man to ber tur Rice transfer hi official a puan a ni thuai ang.
Bruno Fernandes pawhin Man Utd pre season training a la zawm lova, a zawm thuai ang. Rafael Leao chu transfer window inhawn tirlam khan European club lian dang nen sawizawm ni ve mahse kum 24 a upa hian AC Milan a cham chhunzawm turin kum 2028 thleng daih tur contract thar a ziak.
An pali zinga hma hun chiang lo mek chu Joao Cancelo a ni. Portuguese star hi Bayern chuan thlaruk an kawl hnuin a nghetin £60 million a an lakluh an duh lova, club atangin an chhuah fel tawh. Man City boss Pep Guardiola lah in kum 28 a upa hi chhawr zel a tum tawh lova, kumin nipui bazar City chuan Cancelo hi an hralhchhuah ngei a rinawm.
Tun dinhmunah Barcelona leh Arsenal te chu Cancelo lalut tura rinkai ber te anni mek a, Gunners chuan Ajax atangin Jurrien Timber lalut thei dawn mahse left back leh right back a chhawr kawp theih Cancelo hi an la duh cheu nia sawi a ni.
City lam chuan Cancelo manah £60 million an beisei a, amaherawchu an hralhchhuah theihna tur anih dawn phawt chuan man tlawm zawka kaltir mai an hnial lovang. Cancelo hian kumin nipui bazarah Emirates Stadium a pan dawn em kan hre thuai ang.