Manchester United in Leeds United lakah hnehna chang zo lo mahse manager Erik Ten Hag erawh in point hlawhchhuak tura a nau te beihletna chu fakawm a ti.
Nizan Premier League inkhelah Manchester United in an khelmual Old Trafford ah Leeds United an lo mikhual a, rinloh takin team pahnihte hi 2-2 in an inhnehtawk.
Mikhual lamin Gnonto leh Varane (OG’) hmanga hma an hruai zet hnuah mual neitu lamin Marcus Rashford leh Jadon Sancho te goal hmangin an siphurh an sut zo a, point 1 hlu tak an sualchhuak.
Inkhelh banah Red Devils boss Ten Hag chuan Leeds United laka an game chungchang hetiang hian a sawichhuak, ” Ngaihdan a inpawlh nuai mai. Ni e, a tawpah khan point kan hlawhchhuah avangin kan lawm hle a, amaherawchu point 2 kan paih thung.”
“Bul kan tanchhe takzet a, pawmzam mai mai theih a nilo. A bikin derby match ah chuan indona hmachhawn tura kan inpeih reng a ngai a, kan mawhphurna kan hlen ngam tur a ni. Chutiang thil chu kan tilo. Team player te erawh ka fak duh a, theihtawp chhuaha an beihletna kha a ropui hle. Team goal hnih tha tak tak kan khung bawk” a ti.
Nizan inkhela goal khat khungtu Marcus Rashford chuan tun season ah club tan goal 20 a khung tling der tawh a, a form a la hloh lo. Tin, hliam damkawr Jadon Sancho pawh goal nen a rawn kir a, season chawhnu lamah hian a lakah fans te beiseina a sang dawn.
Manchester United hian season kal mek ah league game 22 an khelh atangin point 43 an hlawhchhuak tawh a, table ah 3-na anni mek. An game leh ah hian nizana an inhnehtawk pui Leeds United an hmachhawn leh dawn a, point 3 hmuh ngei an tum tawh ang.