Agent Mino Raiola chuan Paul Pogba hmalam hun tur chungchang sawiin, Manchester United star hian offers hrang hrang a hmuh teuh thu a sawi.
Manchester United midfielder Paul Pogba hian kum 2016 khan Juventus atang Manchester United hi €105 million lai maiin a zawm a, heta tang hian duhtu a nei zeuh zeuh. Mahse, Man Utd-ah hian chet that chang te a nei a, chet that loh chang pawh a nei nuk mai.
Manchester United a pan hnuah hian hliam pawhin a tlak buak nasa a, Tun season khelh mekah hian match 8 lai a khel lova, heng zinga match 6 te hi hliam neih vang khello a ni nghe nghe.
Paul Pogba’an Manchester United lama contract a neih hi nakum June thlaah a zo dawn a, January thla atang amah duhtu te chuan lak theihna annei tawh dawn a. Spanish club lian Real Madrid hi amah la thei tur zingah chuan an langsar hle.
A agent Mino Raiola chuan chiang takin club hming ala sawi lem lova, mahse, Manchester United star in offer a hmuh nual thu a sawi a, hetah hian contract pawhsei offer pawh a hmu niin a sawi.
“Paul Pogba tan offer kan hmu tam hle, contract pawhsei pawh a tel. Atana tha tur ber kan zawng ang.” tiin Mino Raiola chuan Sport 1 a hrilh.
Mino Raiola chuan Bayern Munich chu Bundesliga atang Man Utd star Pogba hlawh pe thei tur awmchhun a nih thu a sawi tel. Mahse, Bundesliga hmahruaitu Bayern Munich lamin lak an la tum rih lo niin a sawi bawk.
“Lak tumin an la bei lo, mahse, naktukah pawh a ni maithei. Bayern Munich zawt mai rawh. Mahse, Bayern Munich chauh hi Pogba hlawh pe theitu tur anni. Thla 2 hnuah kan hriat chian ka ring.” tiin a sawi belh.
Source SL