Chelsea boss thar Mauricio Pochettino chuan a hmatawng tichak zual turin forward thar pahnih lakluh belh a la rilruk niin report chuan a tarlang.
Blues hian kuminah an hmatawng tichak zual turin Christopher Nkunku leh Nicolas Jackson te lalut tawh mahse an forward kawllai Romelu Lukaku, Pierre Emerick Aubameyang leh Christian Pulisic te chu club chhuahsan tura ngaih te anni a, hetiang anih vangin Pochettino chuan an forward chhuak tur te hmunruak hnawhkhat tur forward thar lakluh a duh niin a lang.
Evening Standard tarlan danin Blues chuan an hmatawng tichak zual turin Montpellier forward Elye Wahi leh Juventus striker Dusan Vlahovic te chu lakluh an duh a, chutihrualin mumal taka indawrna erawh a la awm lo thung.
French rawlthar Wahi hian season hmasa khan Ligue 1 club Montpellier tan league game 33 a inlan atangin goal 19 a khung a, a kum la naupan ngaituah in a che tha hle a, hma hun eng tak a nei chiang e. Tin, Chelsea nena sawizawm dang leh Vlahovic pawh hian season hmasa khan league game 27 a inlan atangin goal 10 leh assist vawi 2 a thawkchhuak.
Daily Mail chuan Juventus in Vlahovic hi Chelsea lama an chhuah phal thu a tarlang a, chutihrualin kum 23 a upa manah hian Old Lady chuan Lukaku bakah sum fai €25 million an beisei.