Tun thlengin Leicester City hnenah transfer fee a add ons an pektlak loh avangin Al Nassr chu an player lakluh thar te hming ziak lut (register) thei lo tura hrem anni mek.
Daily Mail tarlan danin Al Nassr in kumina an player lakluh thar te chu an la ziaklut thei dawn rih lova, a chhan pawh Nigerian international Ahmed Musa transfer chungchanga thil fel hlel a awm vang a ni. Al Nassr chuan 2018 khan Leicester atangin Musa an lalut a, a manah £14 million an inseng.
Musa hian Al Nassr chu league title a chawipui a, 2020 khan club chuan an chhuah zalen leh. Musa khelh that mana Al Nassr in add ons £3,90,000 an pek tur chu tun thlengin Leicester lamin an la dawng lova, hei vanga player register chungchanga hrem tawk anni.
FIFA chuan 2021 khan Al Nassr hi warning a lo pe tawh a, Al Nassr lam hian Leicester hnenah sum fai £3,90,000 an pektlak thuai loh chuan transfer bazar thum chhung player lalut thei lo tura hrem an tawk thei bawk.
Public Investment Fund chuan an laka hremna hi hlihkian thuai an duh a, chumi tur chuan Leicester City hnenah Musa mana add ons kha pektlak thuai an tum.
Season hmasaa Al Nassr in league title an hlawhchhuah theihloh hnuin season tharah chawi ngei an tum dawn a, an midfield lai tichak zual turin Croatian international Marcelo Brozovic chu Inter Milan atangin an lalut fel tawh.
Kumin January thla khan Cristiano Ronaldo chuan Middle East lam a lo pan tawh bawk a, kum 38 a upa Portuguese international hian Al Nassr tan game 16 a inlan atangin goal 14 a khung.