”Player dang pakhat ve mai a ni!” – Cruz Azul star Erik Lira

Major League Soccer lam pan tawh mai tur Ballon d’Or 7 kawltu Lionel Messi chu player dang pakhat ve mai anih thu leh an hlauh bik ngawt loh tur thu MLS club Cruz Azul star Erik Lira chuan a sawichhuak.

July ni 22 a league cup match ah Inter Miami leh Cruz Azul te an inhmachhawn dawn a, he match ah hi Messi an a club thar tur tana a game hmasa ber a khelh a rinawm. Barca captain hlui in MLS lam a pan tur thawm ri va chuan Florida khawpui mai nilo United States hmun hrang hrang a dengchhuak a, MLS a khel player te ngei pawh an league a Argentine captain a lo inkhel ve tur hi an phur tlang hle.

Hetih mek lai hian Cruz Azul star Erik Liza chuan thawm nei lian tak leh tantu pawh ngah tak Leo Messi chu player dang pakhat ve mai anih thu leh an hlauh bik ngawt loh thu hetiang hian a sawichhuak, ”Ke pahnih leh mit pahnih a neih ve chhung chuan player dang pakhat ve mai a ni. Kan tan chuan hun remchang dang a ni dawn a, tournament thar anih dawn avangin theihtawp chhuah in kan bei ang. League cup a Inter Miami hmachhawn chu game dang pakhat mai a ni.”

”Ferretti (Cruz Azul manager) chuan Messi chu player dang pakhat ve mai anih thu min hrilh a, ni e player lar leh hrawl tak chu a ni ngei mai, amaherawhchu kan hlauh bik ngawt chhan tur a awm lova, he game ah hian hnehna kan chang ngei dawn tih pawh ka chiang e” a ti.

Messi chauh hi Inter Miami zawm tur star lian a ni lova, Spain legend Sergio Busquets pawh Inter Miami in an sign dawn. Tin, Barcelona a Messi leh Busquets te lo khelhpui thin Jordi Alba pawh Inter Miami nena sawizawm an hlawh hle a, Chelsea star hlui Real Madrid a beisei phak loh Eden Hazard pawh Inter Miami lam ngaihven ruk mek a ni bawk.