Paris Saint Germain goalkeeper Guanluigi Donnarumma chuan nimin zinglama a bialnu nena an thil tawn tihbaiawm tak mai a sawichhuak.
Donnarumma leh a bialnu Alessia Elefante te chu nimin khan Paris a an chênna in ah beih an tawk a, rawk zui anni bawk. Donnarumma hi phuarbeh a ni a, in a awm thil hlu €5,00,000 man hu vel chu misual rual hian la in an tlan bo pui.
He inrawkna hi Zirtawpni liamta zing lam dar 3 vela thleng niin misual ho an tlan bo hnu hian Donarumma leh a bialnu te’n an in hnaia awm hotel man to tak lam an pan a, hotel thawktute hian he thil thleng hi Police te hnena an thlen hnuin Donarumma leh a bialnu te pawhin damdawi in lam an pan zui.
Donarumma chuan Zirtawpni zinga a bialnu nena an thil tawn tihbaiawm tak mai chu Libero kaltlangin hetiang hian a sawichhuak, “Zinglam dar 3 a mahni in ah ngei kan hmelhriat ngai loh mi thenkhat han hmuh kha ka ngaihdan chuan ka hun tawn tawha nawm loh ka tih ber tum a ni ang. Kei chu phuarbeh ka ni a, Alessia chu kan neih thil hlu te an kuta hlan turin an ti. Chipchiar takin ka la sawi thei lova, a chhan chu he thil thleng hi chhui zui mek anih vang a ni. Case chhuizui lai mek anih avangin keini pawh in a awm phalsak ka la ni lova, tunah hian hotel ah kan khawsa mek a ni.”
”Alessia kha ka hlauhthawn pui takzet a, a chhan chu a chungah thil tha lo a thleng mai tih ka hlauh vang a ni. Ka mangang takzet a, chuta chhapah phuar beh tlat ka nih avangin eng thil mah ka ti thei lo. French tawng ka thiam nal loh avangin a harsa zual hle a, an thil duh te awmna kha ka hrilh thiam mai thin lo” a ti.
Donnarumma chauh hi tun hnaia rawk tawk a ni lova, Paris Saint Germain player hlui Angel Di Maria, Thiago Silva leh Mauro Icardi te pawhin rawk an lo tawk tawh.
Police te chuan Donnarumma te in rawktu misual rual hi man ngei tumin an chhuzui mek a, tunah erawh han rinhlelh tur mi an la hmu/hre mai lo.