Manchester City manager Pep Guardiola chuan World Cup hnua beisei pha lo Phil Foden chu he club tana mi pawimawh anih thu leh tha taka a lo kir leh tur thu a sawichhuak.
December thlatawp lam atanga chhiarin Foden hian City tan game 3 ah chiah inkhel bul a la tan a, tum li lai substitution bench a luahlum thung. City leh Nottingham Forest te an inhmachhawn tumin Foden hian goal khung lo mahse a chet danah Pep Guardiola a lawm hle.
Kum 22 mi Foden hian tun season ah Cityzens tan game 29 (all competition) a inlan atangin goal 9 leh assist vawi 4 a thawkchhuak tawh. Tun hnai chho ah hliam tenau a neih avangin beisei a pha lo a, Pep erawh in a fachuam hian a tha taka a lo kir leh a beisei.
Pep chuan, “World Cup zawh khan ani(Foden) aia tha player ka hmu nual a, a kerek hliam in harsatna tam tak a thlen niin a lang. A inhliam chung pawh tha takin a khel a, tum khat erawh ka hnenah lo kal in ‘Pep, ka chhunzawm thei tawh ngang lo a ni’ a rawn ti. Keini lam pawhin a dinhmun hrethiam in karkhat atanga karhnih chhung chawlh kan lo pe a ni” a ti.
City boss chuan sawi chhunzawmin,” Phil hi he club lunghlu a ni a, tun hnaia a inlan tam loh chhan hi a khelhthat loh vang emaw inrintawkna a tlakchham vang a nilo. Kum 17,18,19 anih lai atang tawh in inkhel mualah minute 5 chauh pawh inlan se minute 5 tha ber hman a tum thin. Tun season ah erawh chutiang chu a thleng chiah lova, a kerek hliam in a tihbuai nasat vang a ni ber. Tha takin engkim ka hrilh a, ‘season hmasa lam i pha lo deuh anih pawhin thil kalphung pangngai mai a ni e; a pawimawh ber chu tuna i harsatna tawh i hmachhawn dan a n’ tiin.”
Man City hian zanin dar 11:00 ah Bournemouth an luhkhung dawn a, Phil Foden a inlan ngei a beiseiawm a, chutihrualin a forward pui Riyad Mahrez leh Jack Grealish te form lai tak erawh a ni.
