Manchester City legend tuna Burnley head coach hna thawk mêk tu Vincent Kompany chuan Pep Guardiola thlaktu tura a la that tawk loh thu a sawi.
Kompany hian Burnley a enkawl season khatna ah a chet that pui nghal hle a, point 10 laiin Clarets chu Championship lamah hma a hruai fal pui tawh.
City boss Pep Guardiola chuan Burnley tana Vincent Kompany hnathawh chu ropui a tih thu leh engtik ni ah emaw Manchester City manager a la nih ngei tur thu a sawi lâwk.
Premier League chuan Manchester City hi FFP chungchangah a chhui mek a, heng thil vang hian manager Pep Guardiola chu Etihad Stadium chhuahsan tura ngaih anih thu media te’n an tarlang. Tin, Pep an City a chhuahsan chuan a thlaktu tur âwm ang ber chu Vincent Kompany anih thu tarlan a ni bawk.
Kompany erawh in Pep thlaktu tura a la that tawk loh thu leh Burnley tan chauha rilru zawng zawng a pek thu hetiang hian a sawi, “City hian khawvela manager tha ber neih zel hi an phû a, chuvangin keichu ka la ni thei rih lo phawt. Ka thil tum ber chu Burnley tih hmasawn zel hi a ni a, enge thleng zel kan hre chho ang chu.”
“City hian khawvela manager tha ber an kawl a, kum 10 dang a la cham ka beisei. Anih loh pawhin Pep hnua manager tha ber nei se ka duh a, keima lam atang chuan ka awmna (ranking) hi a la hniam mah mah” a ti.
City leh Burnley te hi FA Cup quarter final ah an inhmachhawn dawn a, March ni 18 zanah match hi khelh a ni ang. Vincent Kompany leh Pep Guardiola te hian City tan Premier League title pahnih, EFL Carabao Cup 2 leh FA Cup te an la chawi dun tawh.
Pep leh a nau te hian naktuk zanah Crystal Palace chu Selhurst Park ah an hmachhawn dawn a, Kompany leh a nau te pawh in Wigan Athletic an lo mikhual ve bawk ang.