Manchester United midfielder Paul Pogba chuan Premiere League game 2 a khelh atangin assist vawi 5 lai a nei nghal a, Premiere League season khata assist nei hnem ber pahnih Kevin De Bruyne leh Thierry Henry record neih hi a khum thei ang mai ang em.
Premiere League season khelh mekah Man Utd midfielder Paul Pogba hi a che tha nghal hle a, 2021/22 season kal mekah game hmasa 2 an khelh tawh atangin assist vawi 5 a nei nghal der.
Manchester United in tun season atana an game hmasa berah Leeds United an hmachhawn a, Red Devils lam hian 5-1 in hnehna an chang, Man Utd goal 5 khung atanga goal 4 lai mai hi Paul Pogba assist a ni. Pathianni zana Southampton nen an inhmachhawn tumah kha chuan 1-1 in an indraw a, United tana goal awmchhun khungtu chu Mason Greendwood niin Pogba assist tho a ni.
Season hmasa ngaihtuah chuan a ti tha ang reng, season hmasa-ah khan games 26 a khelh atangin assist vawi 3 chiah a nei a, 2021/22 season game hmasa berah season hmasa lama a assist record neih a khum nghal tihna a nih chu. Tunah hian Premiere League match 36 lai mai khelh tur ala awm a, Premiere League season khata assist nei hnem ber record pha turin assist vawi 15 a mamawh a ni.
2002/03 season-ah khan Arsenal star Thierry Henry chuan games 35 atangin assist vawi 20 lai alo nei tling tawh a, Premiere League season khata assist nei hnem ber a ni. Kum 17 hnuah Henry record neih chu Manchester City star Kevin De Bruyne chuan rawn nih rual pui ve leh in 2019/20 season-ah khan assist vawi 20 lai a rawn nei ve a ni. Belgian midfielder hian 2016/17 season ah khan assist vawi 18 alo nei tawh bawk.
Premiere League season khata assist neih tam lamah Mesut Ozil chuan Thierry Henry record neih a phak teuh hle, 2015/16 season khan match 35 a khelh atangin assist vawi 19 lai mai a nei tling ve a ni.
Arsenal leh Chelsea midfielder hlui Cesc Fabregas pawhin Henry record neih hi a phak teuh hle, 2014/15 season khan match 34 a khelh atangin assist vawi 18 a nei tling. Fabregas hi Premiere League history-a assist nei tam lamah pahnihna a ni, match 350 a khelh atangin assist vawi 111 lai a nei. Ryan Giggs hian assist 162 a nei tling ve thung.
Premiere League season khata assist nei hnem zual te:
Cesc Fabregas (2014/15 season, assist 18) Chelsea
Kevin de Bruyne (2016/17 season, assist 18) Manchester City
Mesut Ozil (2015/16 season, assist 19) Arsenal
Kevin de Bruyne (2019/20 season, assist 20) Manchester City
Thierry Henry (2002/03 season, assist 20) Arsenal
Source Sl