Sky Sports pundit Paul Merson chuan Kai Havertz leh Mason Mount te hralhchhuaktu Chelsea chet dan a sawisel a, an player tha ber ber pahnihte an hralhchhuak mai chu club tana business tha anih loh thu a sawi.
Chelsea in 2022-23 season a transfer window pahnih ah player thar lakluh nan ringawt £600 million an inseng tling a, Financial Fair Play dan an zam chu an bawhchhiat mai loh nan tiin kumin nipui bazarah player tam tak an hralhchhuah a ngaih phah!
Tawnhriat ngah tak tak player thenkhat N’Golo Kante, Mateo Kovacic, Kalidou Koulibaly leh Edouard Mendy te chuan Stamford Brigde an chhuahsan fel tawh a, anni bakah star player Kai Havertz leh Mason Mount te chuan £65 million leh £60 million te in Arsenal leh Manchester United te an zawm bawk.
Blues in player hralhna atanga sum tam tak hailut tawhin player thenkhat sign ve bawk mahse Paul Merson chuan Chelsea transfer kalpui dan chu hetiang hian a sawisel, “Dik tak chuan Mason Mount leh Kai Havertz te hralhchhuah hi Chelsea tana business tha a ni lova, eng vanga hralhchhuak nge an nih tih hi ka hrethiam lo. Nia a dik a lawm heng player tha te hralhna atangin sum an hailut ngei dawn tih chu. Amaherawhchu top 4 ah inhamtang thei lo se sum tam zawk hloh thei anni.”
”Man Utd, Arsenal leh Chelsea te hian season tharah top 4 huanga awm an inchuh ngei dawn a, tichuan i player kawl tha ber pahnihte chu i elpui club hnenah i hralh ang maw? Chelsea fans te chuan Mount leh Havertz te’n season an hmang tha lo an tih a ni mahna, mahse player tha anni a, an kalna team an tichak sawt ngei dawn.”
”Real Madrid emaw Bayern Munich lamah hralh chu nise ka hrethiam viau, chuti nilo an position awm duhna ngawih ngawiha rawn awm tum ve an elpui club hnenah an player tha te an kaltir ania! Chuta chhapah an hralhna man atangin Premier League ah a tha em tih pawh hriat loh player la naupang tak tak an chawlut a. Tuna Chelsea kal dan hi chu, tun atanga kum 5 hnu ah chauh champion an tum niin a lang.”