Sihnih faia Wolverhampton an hneh hnuin Liverpool defender Virgil van Dijk chuan hnehna an chan avanga a lawm thu leh an game leh a Manchester United an lo mikhual hunah erawh Anfield boruak chu pui tak nise a duh.
Nizan khan Liverpool chuan Anfield ah Wolverhampton an lo mikhual a, Reds hian Virgil van Dijk leh Mohamed Salah te goal hmangin an khingpuite an tukdawl a, point 3 hlu tak an hlawhchhuak.
Tun season a beisei pha lo Reds in league lamah hma an sawn chho tan a, game 24 atanga point 39 hlawhchhuak tawh in table ah 6-na anni mêk. Palina a awm leh an aia game khata khel tam zawk Spurs chu point 6 in an la phâk lo mêk bawk.
“Hnehna chan kha a pawimawh hle a, tunah chuan chawlh hahdam phawt a kan game khelh leh tura rilru pêk a pawimawh” tiin Van Dijk chuan inkhelh banah a sawichhuak.
Dutch defender chuan sawi chhunzawmin, “Tun season ah kan lo hmachhawn tawh a, an(Wolves) tawh pawh a khirh zek a ni. Vawiin pawh khan an la danglam chuang lova, chuvangin dawhtheih taka a hun dik tak nghahchhuah kha kan thil tum a ni.”
Reds hian an game leh ah tun hnaia form tak leh Carabao Cup chawi hlim Manchester United an hmachhawn dawn a, Van Dijk chuan game harsa tak anih tur thu leh fans te atanga thlawpna tha tak dawn a inbeisei thu a sawi.
Van Dijk chuan, “Sunday ah chuan boruak pui tak kan mamawh dawn. Vawiin khan kan nervous deuh vek in ka hria a, Sunday ah erawh inrintawkna nen keimahnia a tha ber theuh kan phochhuah a ngai ang. Team form tak Manchester United kan hmachhawn dawn a, chuvangin kan game leh tur hi a awlsam dawn hauh lo” a ti.
Wolves laka goal khat khungtu Van Dijk hian Premier League ah goal 20 a khung tling ta a, 2015 a Celtic atanga Southampton a pan hnua Premier League defender goal khung tam ber a ni.