Hliam avanga hun rei tak chhung a chawlh hnuin Zlatan Ibrahimovic a inkhel leh thei tawh dawn a, inkhel muala hun a hman hma hauhin a la that tawk zia huai takin a chhakchhuak.
Thla kaw chhung meuh khup hliam avangin a inkhel thei lova, tunah erawh a hliam te dam fel tawhin team tana theihtawp chhuah a chak zek zek tawh.
Kum 41 a upa hian season hmasa khan league game 23 a inlan atangin goal 8 leh assist vawi 3 a thawkchhuak a, AC Milan chu Serie-A title (Scudetto) a chawipui. Tun season kal mek ah erawh Swedish pachal hi hliam avangin a team tan game khat mah a la khel lo thung.
“Pathian ka la ni a, Number one ka la ni reng bawk. Tunah chuan ka lo kir dawn a, rimawi thlak a hun e. Thla tam tak ka hloh a, hun ka khawhral nasa hle. Tunah chuan thil tam tak tih ka duh” tiin Ibrahimovic chuan Sport Mediaset a hrilh.
“Ka tha a, ka dam tha takzet. Ka teammate te bulah ka kir a, field chhung leh pawn thlengin nuam ka ti a, ka zalen hle bawk. Ka inhliam chhung khan kan coach, staff leh he club hi pawnlam atangin theitawpin ka lo pui ve thin. A tha thei ang bera ka lo kir leh theihnan ka dawhthei em em a, kan tum leh beisei ang ngeiin ka hliam pawh a dam tha chak e” a ti.
Tun hnaia AC Milan an chet that loh chungchangah Zlatan chuan a ngaihdan sawi leh in,”Ka hlauthawng lem lo, championship ah chuan heng hi thil pangngai mai a ni. Tunah chuan pawn lama tawng tlem a, inkhel muala kan hlutna tak lanchhuah tir a hun e”.
Milan in an game leh a Torino an hmachhawn hunah hliam damkawr Zlatan Ibrahimovic hi an chhawr theih ngei a rinawm. Champion lai AC Milan hian tun season ah league game 21 an khelh atangin point 38 an hlawhchhuak tawh a, table ah 6-na anni mek. An nomawi kawllai humhim turin season chawhnu lamah tan nasa tak an lak a ngai.