Paris Saint Germain chuan Rasmus Hojlund transfer hijack an tum a, Atalanta striker hi Manchester United chuan lâkluh tumin tan an khawh mêk a ni.
Kylian Mbappe an chân ngei dawn nia a lan hnuin Ligue 1 champion PSG chuan Rasmus Hojlund an ngaihven thar a, Juventus striker Dusan Vlahovic pawh an dawr mêk bawk.
Red Devils in number 9 thar an mamawh em em a, tun nipui bazarah midfielder leh goalkeeper thar lalut tawh mahse an la duhtawk mai dawn lova, striker thar lâkluh chu an tihmak mawh niin a lang.
United chuan Rasmus Hojlund manah hian £40 million leh player an offer tel a, mahse Atalanta lam chuan heihi lo hnâwlin an striker thangduang tak manah hian £85 million an phut hlauh thung!
United leh Hojlund te hian mimal thilah inremna nei fel tawh mahse club pahnihte indawrna erawh in hma a sawn hleithei lova, a chhan pawh player man chungchanga an ngaihdan a inan loh êm vang a ni.
United nena sawizawm an hlawh viau laiin Hojlund lâkluh tumtu zingah PSG an rawn tel thar a, kum 20 a upa manah hian French champion chuan sum thahnem tak bakah an rawlthar Hugo Ekitike pêk tel an phal a, kum 21 a upa French rawlthar hi Atalanta lam pawhin an beisei ruk deuh anih thu RMC Sport chuan a tarlang.
Hetih mêk lai hian PSG chuan Japan-a pre season tour nei tur team squad ah Kylian Mbappe an telh lova, French forward hian contract thar a ziah duh loh avangin PSG in kuminah a to thei ang bera hralhchhuah an tum dawn a ni.
Argentine captain Lionel Messi chuan free agent in kuminah Parc des Princes a chhuahsan a, Kylian Mbappe pawhin PSG a chhuahsan ngei a rinawm bawk. Hetiang anih tâkah chuan Ligue 1 champion hian forward thar an lâkluh ngei a ngai dawn a, tun dinhmunah Bernardo Silva, Dusan Vlahovic leh Rasmus Hojlund te chu an player lâkluh tum te anni.