Paris a Messi la cham zel ringtu Luis Campos

Tun season zawh rualin Lionel Messi an Parc des Princes a a contract neih lai hmang zo tawh dawn mahse Paris Saint Germain club sporting director Luis Campos erawh in Argentine forward hi a la cham zel a beisei thung.

PSG Football Advisor kum 58 a upa Campos chuan tun hnaia RMC in an kawmna ah Messi hma hun tur chungchanga an zawhna chhangin, “He hmunah hian a la cham duh zel ang em tih ka zawt tawh a, he club tana ka thawh chhung hian a la cham chhunzawm zel ka beisei thu pawh ka hrilh bawk. Leo lakah hian kan lawm a kim hle” a ti.

Nikum khan Barcelona in sum lamah buaina nasa tak an tawk a, €1.3 billion hu ba an nei tling. An player te hlawh an tihhniam mai bakah Barca player hlawh tam ber Lionel Messi an Camp Nou a chhuahsan bawk.

Tunah erawh Barca in TV rights leh sponsorship na atang te in sum an hailut nual a, transfer bazar hnuhnung berah pawh an che na hle anih kha. Barca sum dinhmun a that tak hnu hian Lionel Messi chu Camp Nou a kir leh tur anga sawi thawm a tam tan hle. Barcelona manager Xavi ngei pawh in, ”Barcelona a Messi hun hi a la tawp mai ka ring lo” tiin Lionel Messi chu Camp Nou a a kir leh a rin thu a sawichhuak.

PSG lam hian Messi chu kum khat dang contract an zawrh hnai niin media te’n an tarlang a, Messi erawh in World Cup khelh zawh hma chu a hma hun turah thutlukna siam a tum lo thung.

Related Posts

error: Content is protected !!