Neymar Jr chuan a thianpa Lionel Messi an Inter Miami a zawm chungchangah a ngaihdan a sawi a, MLS lama kal chu Messi tana duhthlanna tha ber anih thu leh Miami ah a chhungte nen hlim taka an awm tur thu a sawi.
2021 nipui bazar lai khan Messi chuan free agent in Paris Saint Germain a zawm a, Neymar leh Mbappe te nen an khelh ho avangin an lakah fans te beiseina a sang takzet. Amaherawhchu MNM in beisei an phâk lova, season hnih an khelh ho chhung khan league title pahnih chawi mahse UCL erawh an chawi thei lo.
Messi leh Neymar te’n fans lawm an hlawh lo zual a, UCL atanga an tlâk hnu phei chuan an inkhel lai fans te’n an boo khum fo va, Barca captain hlui Messi tan zawng season hnih liamta chhung kha club career-a a hun tawn duhawm loh ber tum a ni.
Tunah chuan kum 36 a upa hian atan leh a chhungte tana hmun nuam leh hahdamthlâk ber tura a ngaih United States lam a pan tawh a, Miami tan kum 2025 thleng contract a nei.
Neymar chuan a thianpa Messi an Miami lam a pan chungchangah hetiang hian a ngaihdan a sawi,” Kum hnih liamta chhunga a thil tawn zawng zawng avang khan amah mai nilo a chhungte ah pawh nghawng nasa tak a nei. Tunah chuan engkim a hlawhchhuak tawh a, tha taka an lo dawnsawn theihna tur hmun a pan hi ka hriatthiam pui lutuk. Miami ah chuan a nun dan a danglam hlak dawn a, a chhungte pawh nuam ti takin an awm tawh ang. A tana duhthlanna tha tak a ni a, Paris a kum hnih kan hman ho kha a chu a harsa takzet a ni” a ti.
Messi an PSG chhuahsan tawh mahse Neymar erawh PSG ah la cham zel a tum a, Brazilian international hian Parc des Princes ah kum 2025 thleng contract a la nei.