Kan hriat angin tun summer transfer-ah khan Cole Palmer chuan Man City atangin Chelsea a zawm a, Chelsea a zawm hmaa an inbiak dan kimchang Man City boss Pep Guardiola’an a sawi chhuak.
Man City lama hun a hman chhung khan match 41 lai mai City tan khel ve hmanin, goal 6 a khung mai bakah assist vawi 2 a nei tling. Stamford Bridge a pan hma lawk khan City tan game 3 a khelh atangin goal 2 a khung nghe nghe.
Cole Palmer’an City a chhuahsan hma lawka an inbiak dan kimchang Pep Guardiola chuan a sawi lang niin transfer expert Fabrizio Romano chuan a tarlang. Pep Guardiola chuan Palmer hnenah chance a neih theih tur thu a hrilh niin a lang.
Amaherawhchu, Palmer chuan City chhuahsan a duh ve hrim hrim a, Chelsea a pan ve ta a ni.
“Kum 1 emaw kum 2 hnuah Cole Palmer chuan ti hian min hrilh, ‘Heta khelh hi ka duh tawh lo’ tiin, kei chuan a hnenah, ‘Mahrez hi a chhuak dawn a, chance i nei thei dawn’ tinin ka hrilh a. Mahse, Palmer chuan, ‘Ni lo, ka chhuak duh zawk a ni’ tiin a sawi leh a, ‘Awle, chhuak rawh’ tiin ka hrilh ta a ni. A tan a tha zawk dawn a, mi fel tak a ni, a kal leh zelna turah duhsakna sang ber ka hlan” tiin Pep Guardiola chuan a sawi.
Mahrez chuan Al-Ahli a pan a, match 13 a khelh tawh atangin goal 5 a khung mai bakah assist vawi 7 lai a nei tling mek.
Hetihlai hian Palmer pawh Chelsea lamah bul a rawn tha viau a, Chelsea player rinrawl ber pakhat ni a ni ve bawk. Mauricio Pochettino hnuaiah match 10 inlan tawhin goal 3 khung mai bakah assist vawi 4 a nei ve mek bawk.
Zanin hian a club hlui Man City a hmachhawn dawn a, hnehna chan pui thei tak ang maw.