Napoli President Aurelio De Laurentiis chuan an striker Victor Osimhen chu zawrhlai anih loh thu a sawichhuak.
Nigerian striker hi European club lian pahnih Manchester United leh Bayern Munich te nena sawizawm mek anni a, a manah pawh Man Utd chuan £100 million aia tam insen an inhuam thu media te’n an tarlang.
Anthony Martial chu hliam in a tihbuai reng avangin Man Utd tan innghahna tlak a ni lova, loan a thlaruk chhung atana an hawh Wout Weghosrt pawhin beisei a pha lo hle. Ten Hag chuan nipui transfer bazar ah striker thar lakluh ngei a tum dawn a, Osimhen chu an buaina sukiang thei tu turah a ngai.
German champion Bayern Munich lam pawhin striker thar an zawng mek a, Lewandowski an Allianz Arena a chhuahsan hnuin Bavarians hian number 9 thar lakluh tumin tan an la mek a, Victor Osimhen emaw Spurs striker Harry Kane an beisei ang.
European club lian te’n hel mek mahse Napoli President De Laurentiis chuan an striker kum 24 a upa chu zawrhlai anih loh thu a sawichhuak. ” Victor hi zawrhlai a nilo! Kan player te hi club dangte’n lakluh an duh a, amaherawhchu a tu a mah hi kan hralhchhuah a tul lem lo; ba kan nei lo” a ti.
Nigerian striker hian Diego Armando Maradona Stadium ah kum 2025 June thla thleng contract a la nei a, club lamin a hralhchhuah an hmanhmawh lo. Amaherawhchu a player berin chhuah a duh tal chuan club lam tan pawh han chelhbeh reng chu thil tih chi a ni lovang.
Osimhen hian tun season kal mek ah Napoli tan league game 17 a inlan atangin goal 16 leh assist vawi 3 a thawkchhuak tawh a, a team chu Serie A table ah 1-na anih pui mek. Napoli hian pahnihna a awm Inter Milan chu khelh zat inang ah point 13 laiin an tlansan tawh a, 1990 hnuah Serie A title chawi turin dinhmun tha ah an ding mek bawk.