Serie A hmahruaitu Napoli chuan Zirtawpni zanlai khan Mapei Stadium ah Sassuolo an luhkhung a, 2-0 a hnehna changin point 3 hlu tak an hlawhchhuak.
Mual neitu Sassuolo lam chuan first half tawp hma hretin goal khat khung ve bawk mahse VAR hmanga enthat leh anih hnuin pawm loh a ni.
Kvaratskhelia leh Victor Osimhen te’n Napoli tan Sassuolo lakah goal khat ve ve an khung a, an team chu hnehna chan pui in league table ah point 18 laiin hma an hruai fal ta!
Napoli manager Luciano Spalletti chuan manager anih anga a game 1000 na ah a team te hnehna a chanpui a, kum 33 hnuah Napoli chu league title a chawipui theih a beiseiawm hle bawk.
Nizana goal khat khungtu Nigerian forward Victor Osimhen chuan Napoli tan a zawnin Serie A match 7 ah goal a khung tawh a, three points era (1994-95) hnua hetiang tithei hi Napoli player atangin Osimhen chiah a la awm. Argentine forward hlui Gonzalo Higuain chuan 2015-16 season khan Napoli tan hian a zawnin Serie A match 6 ah goal a lo khung tawh bawk.
Osimhen hian hliam tenau a neih avangin nizan khan minute 84 naa lâkchhuah a ni a, an game leh a Champions League Round of 16 first leg a Eintracht Frankfurt an hmachhawn hunah a inlan thei dawn em tih a chiang ta lo.
Serie A lamah Napoli hian game 23 an khelh atangin point 62 an hlawhchhuak tawh a, table chung ber luah chhunzawm zel in an hnuai chiah ah Inter Milan chu khelh 22 atanga point 44 hmu tawh in an awm ve bawk.