Andre Onana chungchangah rei ngial an indawr hnu pawhin Manchester United leh Inter Milan te player manah an la inrem fel thei mai lova, United in Onana hi an lalut thei lo anih chuan season tharah Dean Henderson an chhawr a ngai dawn.
Inter lam chuan an goalkeeper manah hian £51 million an phut a, Man Utd lamin erawh in Cameroon international kum 27 a upa manah hian £43 aia tam insen an tum lo nia report a ni.
United hian Spanish goalkeeper David De Gea an chhuah fel tawh avangin a thlaktu tur goalkeeper thar an mamawh em em a, Onana chu an top target ni mek mahse an lalut thei mai lo.
Season hmasa ah loan a Nottingham Forest tana khel Dean Henderson chuan a ngheta City ground lam pan a duh a, chutihrualin Erik Ten Hag chuan goalkeeper thar an lakluh fel hma chu English goalkeeper kum 26 mi hi la chhuahtir mai a tum lo thung.
Nizan pre season friendly match zawh ah reporter te’n ”Dean Henderson hi United tana la chhawr zel theih a ni em?” tia an zawhna Ten Hag chuan chhangin, “Aw, la theih tehreng mai. Season hmasa tluan khan a inkhel ka en fo. Goalkeeper hi position pawimawh tak a ni a, tunah erawh kan player kawl mek te ah hian ka lawm a ni” a ni.
Financial Fair Play dan khuahkhirhna avangin Man Utd hian kuminah player thar lakluh nan £120 million chauh an hmang thei a, Chelsea atangin Mount chu £60 million in an lalut fel tawh.
United hian goalkeeper leh striker thar lakluh an an la duh cheu a, chutihrualin £60 million chauh hman tur an neih tawh avangin an player kawllai thenkhat an hralhchhuah pawh a ngai dawn niin a lang.
United hian kum 12 chhung an lo kawl tawh De Gea chu tun nipui bazar hian free agent in an chhuah a, player thar lo lut tur te pawh hlawh tam zawk an offer thei ngei ang. Tun dinhmunah Inter goalkeeper Andre Onana leh Atalanta striker Rasmus Hojlund te chu Man Utd lakluh tum te anni.