Manchester United chuan UEFA Europa League finla-ah Villarreal an hneh lova, trophy nen season khar an tumna chu a thamral leh ta riha, an manager Ole Gunnar Solskjaer chuan final-ah hian an khelh that loh thu a sawi.
United leh Villarreal te hi hun pangngaiah Edinson Cavani leh Gerard Moreno-te goal khat ve ve hmangin an inhnehtawka, Extra Time-ah pawh goal khung belh thei an awm loh zel avangin penalty shoot-out hmangin champion tur zawn a ni a, player 11 ve ve in an pet hnuah Villarreal hi 11-10 in an chaka, penalty pet zingah United goalkeeper David de Gea chiah chu hlah awmchhun a ni.
United hian Solskjaer-a hnuaiah trophy an la chawi lo tluang zela, inkhelh zawhah Solskjaer chuan, “Kan khel tha lova, kan theih angin kan khel lo. Bul kan tan chhe lova, an shot on target neih chhunah an rawn khunga, set play atanga goal kan chhuah erawh a lawmawm loh.
“Kan nawr a, goal pawh kan khung ngeia, mahse goal kan khung hnuah game kan control thei lova, duh angin kan thunun thei lo bawk. Hmun awl an hnawh khat zung zunga, kan tan a harsat phah hle a, ball chang tam zawk ni mah ila, an defend tha hle. Chance tha kan insiam tam tawk lo bawk.
“Tun hi inmawhpuhna hun a ni lova, mahse trophy kan chawi loh hi chuan eng emaw tih dik loh kan nei tihna a ni. Trophy lak hi kan hnaih zela, tun tumah pawh vawi khat ball petah chiah trophy kan lak leh lak loh a innghat. Season tharah hmasawn zawka rawn kir turin phurna kan nei a, a hma aia tha tur chuan thawhrim a ngai a ni,” a ti.
Sawi zelin Norwegian manager chuan, “Tun ai hian hma kan sawn a ngaia, a bak a awm lo. Tun season-ah kan khel tha chho em em a, season bul kan tan tha lova, pre-season kan neih loh bakah, kan game hmasa ber parukah vawi thum lai kan tlawm.
“League lamah kan rawn bei let viaua, rin aiin kan dinhmun a sanga, final kan lut bawk. Mahse, season tha hmang tur chuan final-a chak a ngai a ni,” a ti bawk.