Swedish pachal Zlatan Ibrahimovic chuan inkhel muala a lokir leh thuai tur thu leh inkhelh a la chawlhsan rih mai loh tur thu a sawi. Milan attacker, thlaleh a kum 41 tling tawh tur hian May thla khan khup hliam a nei a, a khup hliam hi zai tawh niin tunah hian a inelkawl mek.
Hliam a neih mek laiin Milan lam chuan July thla khan kum khat dang contract an ziahpui leh a, tunkum tawp thleng Milan khawpuiah a la cham thei ang.
Hliam in a tlakbuak mek a, a kum lam a upa tawh bawk nen, mi tam tak chuan a lokir leh mai an rin tawh loh laiin Zlatan erawh in inkhelh la chawlhsan mai a tum hauh lo thung.
”Ka lokir leh thuai ang. Inkhelh ka la chawlhsan dawn lova, ka lo let anga ka beidawng mai mai lovang” tiin Ibrahimovic an a lokir leh tur thu La Gazetta dello Sport kaltlangin a sawichhuak.
Beisei anga thil a kal anih chuan Zlatan Ibrahimovic hian nakkum January thla atangin a inkhel leh tan thei ang. Kum 40 a upa hian season hmasa khan Milan tan league game 23 inlan in game 11 ah inkhelh bul a tan a, goal 8 leh assist vawi 2 neiin a team chu Serie-A nomawi a chawipui.
Milan hian tun season kal meka game 6 an khelh atangin point 14 an hlawhchhuak tawh a, table ah 6-na anni mek. Rafael Leao leh Oliver Giroud te chuan tun season ah Milan tan goal 3 ve ve an khung tawh bawk.