Manchester City defender Aymeric Laporte chuan nipui transfer bazar inhawn hunah a inkhelh tam theihna tur pan a duh avangin Etihad Stadium chhuahsan a hreh lo niin report chuan a tarlang.
Laporte hian tun season ah Cityzens tan game 15 chauh a la khel a, hliam in a tibuai ve reng bawk nen Pep Guardiola an a aiah Nathan Ake a chhawr ta fo. Manchester City in an game hnuhnung bera Newcastle United an hneh tum pawhin Laporte hian substitution bench a luah tluan.
Spanish club lian Barcelona leh Laporte te chu sawizawm an hlawh chho tan hle a, amaherawhchu nipui bazar ah Blaugrana hian player thar an lalut thei dawn em hriatchian a la nilo.
Barcelona hian nipui bazar inhawn huna player thar chawlut turin an player kawl mek hralhna atanga pound 178 million tal an lakluh a ngaih thu Laliga hotu lam te’n an hrilh nia sawi a ni.
Laliga chief Javier Tebas pawhin, ” Tun dinhmunah chuan Barcelona hian nipui bazar inhawn hunah player thar lakluh nan budget an nei thei rih lo” a ti bawk.
Hetih mek lai hian City chuan Laporte an chan chuan Josko Gvardiol lam an hawi ang. Kum 21 a upa RB Leipzig centre back hi tun dinhmuna centre back thangduang ber pawl niin European club lian te awhrawn a ni.
Gvardiol pawh in Pep Guardiola team zawm chu a hreh in a rinawm lova, amaherawhchu tlawm taka German club a chhuahsan erawh beisei chi a nilo thung.
City hian centre back a chhawr tur John Stones, Nathan Ake, Manuel Akanji leh Ruben Dias te la kawl tho mahse Aymeric Laporte an club a chhuahsan anih chuan a thlaktu tur player thar lakluh an duh nghal ngei ang.