”Ni e, Lukaku an ka call a chhang duh lova, min ti lunghnur takzet” – Martinez

Inter Milan captain Lautaro Martinez chuan a teammate hlui Romelu Lukaku an a call a chhan duh loh thu leh chumi avanga a laka a lungnih loh em em thu a sawi.

Chelsea striker Lukaku hian season hmasa khan loan in Inter Milan a zawm a, Serie-A club hian a ngheta lâkluh zui tum mahse a player berin Inter zawm tumna a nei lova, transfer chungchangah Inter hmelma leh elpui ni bawk Juventus a be pawp.

Martinez chuan Lukaku chungchang hetiang hian a sawi, “Lukaku transfer chungchanga thu leng vak te kha thu dik tak a ni. A pawi ka ti takzet! Biak pawh ka tum ngial thin naa, ka call a chhang duh ngai lo. Ka chunga a tih ang chiah hian midang zawng zawng chungah pawh a ti a ni. Kum engemaw zah chhung kan lo khel dun tawh a, chungte ngaituah phei chuan tuna a chet dan avang hian a lakah ka lungnur takzet” a ti.

Kum 30 a upa Lukaku hian 2022/23 season khan Inter Milan tan inelna hrang hrangah game 37 inlan in goal 14 leh assist vawi 7 a thawkchhuak a, a team chu Supercopa de Espana leh Coppa Italia te a chawipui. UCL final ah erawh a team chu City lakah sikhat faiin a tlawmpui a, substitution bench atanga dah luh niin a chance tha hmuh te a hlah nual avanga sawisel a tawk nasa hle nghe nghe.

Belgium striker hian Saudi lam atangin offer mawm zet mai dawng mahse Europe a la inkhelh chhunzawm zel a duh a, Juventus chuan Lukaku hi lâkluh ngei duh mahse an striker kawllai Dusan Vlahovic a chhuah chauh in lâkluh an tum ang.

Captain nihna pêk anih chungchangah Martinez chuan a ngaihdan hetiang hian a sawi bawk a, “Captain armband hrên tawh chuan kan ko ah mawhphurhna rit zawk a tla tawh tihna a ni a, dressing room lam thlengin kan pawimawhna a zual hle. Mahse captain ka nih hma hauh pawhin heng hi chu ka lo ti fo tawh a, ka teammate te hi pui an ngaihna zawnah chuan theitawp chhuahin ka tanpui thin” a ti.

Argentine striker Martinez hi season hmasaa Inter Milan player pawimawh ber te zinga mi a ni a, a team tan inelna hrang hranga game 57 a inlan atangin goal 28 leh assist vawi 10 a thawkchhuak. Kum 25 a upa hi European club lian thekhat te nena sawizawm ni ve bawk mahse Inter Milan tana la khelh chhunzawm zel a thlang thung.