Liverpool defender Virgil van Dijk chuan club in ngai a awh leh theihnan player tha tak tak an lakluh a ngaih thu a sawichhuak.
Reds in season duhawm lo tak an hmang mek a, UEFA Champions League atangin Real Madrid chuan ni tlemte liamta khan an petchhuak a, Carabao Cup leh FA Cup ah beisei tur an nei tawh lo bawk.
Premier League lamah nise an che tha falua lova, league game 26 atanga point 42 chauh la hlawhchhuakin table ah 6-na anni mek a, champion chu sawi loh top 4 huanga season khar turin an hna a hautak hle dawn. Hetiang anih takah chuan Reds in nomawi chawi lovin 2022-23 season an hmang tluan dawn tihna a ni.
Liverpool defender Van Dijk chuan club in ngai a awh leh theihdan tur hetiang hian a sawichhuak, “Season tawp rualin player thenkhat te an chhuak dawn a, engkim puan fel a ni tawh. Chuvangin kum nga liamtaa kan dinhmun anga kan kir leh theihnan player tha kan tak tak kan lakluh a ngai a, player chhuak tur an awm vang te pawh a ni bawk.”
”Tupawhin a harsat tur zia an hria a, kan tana player dik ber zawn hmuh hi a harsa hle dawn a, chutihrualin club in hemi kawngah hian a tha thei ang ber in hna a thawk tur a ni. Game tam tak khelh tur kan la hmabak a, season thara Champions League khelh leh ngei pawh kan duh. Champions League kan khelhphak chuan he club hian khawvela player tha te a hip thei ang” a ti.
FA Cup khel tura Fulham an fehchhuah dawn avangin kartawp ah Liverpool in league match khelh tur an nei lova, international break an hmang nghal dawn. International break atanga an lo kir hunah Klopp leh a nau te hian league ah Manchester City leh Chelsea te chu away ah an hmachhawn dawn a, heng match pahnih zawh hian Anfield ah league hmahruiatu Gunners an mikhual zui bawk ang.
Heng match pathum te hi Reds tan a pawimawh hle dawn a, an result hlawhchhuahin season tawpa an dinhmun tur a hril thui viau a a rin thu manager Klopp chuan a sawi nghe nghe a ni.