Neymar chuan FC Barcelona atanga chhuak Lionel Messi hnenah Paris Saint-Germain jersey number 10 pek a phal niin report in an tarlang. Argentina superstar Lionel Messi hian a duh mai ang em tih chu mi tamtak nghah mek a ni.
Kan hriat angin Barcelona chuan kum 34 a upa Lionel Messi’an Camp Nou lamah contract thar a sign dawn lo niin an confirm tawh a, Messi la thei tur zingah Paris Saint-Germain an langsar hle.
Transfer expert Fabrizio Romano chuan ti hian a sawi, French club lian Paris Saint-Germain leh Ballon d’Or vawi 6 lo dawng tawhtu hi an in be mek niin a sawi, hetihlai hian Neymar pawhin a teammate hlui Messi nena Paris lama han khelh dun chu a duh hle niin an sawi.
French publication RMC Sport in a tarlan dan chuan, Brazilian Neymar hian Messi nena club pakhat tana khelh dun chu a duh tak zet a, Paris Saint-Germain jersey number 10 pek mai pawh a phal niin an sawi.
Neymar hian Lionel Messi kianga khelh leh chu a duh hle tih a chiang a, eng thil nge thleng zel dawn tih chu khawvelin a thlir mek.
Premiere League champion Manchester City pawh Messi la tur zingah an langsar ve hle a, mahse, Europe media hrang hrang ten an tarlan dan chuan tun transfer window-ah hi chuan lak luh an la tum vak lo niin an tarlang, alan danah chuan Paris Saint-Germain an hnaih ber tawh niin a lang.
Messi hian Parc des Princes a zawm thei a nih ngat chuan, Neymar kiangah a khelh thei mai bakah, Argentina lama a teammate Leandro Paredes leh Angel Di Maria te kiangah pawh a khel thei dawn tihna a nih chu.
Source SL