Paris Saint Germain forward Neymar Jr chuan Liverpool centre back Virgil van Dijk a fak hle a, player chak leh fing tak anih thu a sawi.

Liverpool in UEFA Champions League an chawi hnuhnun ber tum khan Liverpool leh PSG te hi group stage khatah an awm hova, Anfield ah 3-2 in Liverpool an chak. Parc des Princes ah erawh Paris lam 2-1 in an chak ve thung a, Neymar hian goal a khung ve nghe nghe bawk.

DAZN in an kawmnah ah Neymar chuan ,”Van Dijk hmachhawn hi thil harsa tak a ni. Defender chak leh fing tak a ni a, hnaihchilh hun leh tackle hun te a hre em em a, chungte avang chuan hmachhawn a harsa zual. Centre back fing tak hmachhawn hi thil harsa a ni a, a chhan chu tihsual an nei mai mai lo” tiin Van Dijk a lo fak.

Dutch international Van Dijk hi tun hnai kumah hnial rual lovin khawvela defender tha ber te zinga mi a ni. Tun season ah erawh Liverpool an che tha hleithei lova, match 6 an khelh atangin vawi 2 an tlawm tawh. Tum hnih ah chiah cleansheet an la nei a, Bournemouth 9-0 a an sawp tum in leh Everton nena goal lut awm lova an inhnehtawk tum in a ni.

Related Posts

error: Content is protected !!