Paris Saint Germain forward Neymar Jr chu hliam avangin UEFA Champions League Round of 16 2nd leg a Bayern Munich an hmachhawn hunah a inlan thei dawn lo tih Christophe Galtier an a sawi chiang.
Kum 31 a upa hi February ni 19 a PSG in 4-3 a Lille OSC an hneh tumin kerek hliam avanga lakchhuak a ni. PSG hotute leh fans te hlauhthawn ber chu Brazilian forward hian UCL knockout round hmasa ber 2nd leg ah Bayern a hmachhawn thei lovang tih mawlh mai chu a ni.
Hei tunah le! an hlauhthawn ang ngeiin PSG in Allianz Arena a Bayern Munich an hmachhawn hunah an star player Neymar an chhawr thei dawn lova, Ligue 1 champion tan a pawi thui viau maithei.
Paris Saint Germain head coach Christophe Galtier an press conference a neih hnuhnun berah Neymar chungchang hetiang hian a sawichhuak,” Kan game khelh leh tur pahnih ah te Neymar a inlan thei dawn lo. A inlan thei lo tur hi a pawi hle a, kan tan chuan thu lawmawm lo tak a ni” a ti.
Neymar hian tun season ah Ligue 1 champion tan game 28 (all competition) a inlan atangin goal 16 leh assist vawi 16 a thawkchhuak tawh a, team tan a pawimawh vet vet hle. A tel lo in PSG in Bayern an hmachhawn a ngai dawn a, Messi leh Mbappe te ho in Bayern Munich lakah result duhawm hlawhchhuak thei tak ang maw?
PSG hian naktuk zanlai ah league ah Nantes an hmachhawn dawn a, karleh Nilai zanlaiah Bayern Munich khelmualah an leng lut zui ang.
League ah PSG an che tha a, game 25 atanga point 60 hlawhchhuak tawh in an hnuai chiaha awm Marseille chu point 8 laiin an tlanpel mek. Chutihrualin UEFA Champions League lamah erawh eng ruai an ang hleithei lova, round of 16 1st leg ah Bayern Munich chu an khelmual Parc des Princes an sikhat faiin an ngam lo. 2nd leg ah PSG hna a hautak hle dawn a, quarter final lut turin Allianz Arena ah hnehna an chan ngei a tul dawn.