Newcastle United chuan AC Milan atangin Sandro Tonali an sign fel a, kum 5 chhung daih tur contract an ziahpui. Kum 23 a upa manah hian Magpies chuan add ons nena belhkhawmin €70 million an inseng a, Magpies hian an hralhchhuak leh anih chuan an hralhna man atanga 10% chu AC Milan hnenah an pe bawk ang.
Tonali hi Italian player man to ber niin Jorginho, Gianluigi Buffon leh Christian Vieri te hralhchhuahna man ai pawha to zawk a ni. Tin, Tonali hi AC Milan player hralh to ber niin Real Madrid hnena €67 million a Ricardo Kaka an hralhna man kha a khum a ni.
Tonali hi Serie-A player hralhchhuah to ber panga-na a ni bawk a, ani aia to player hralhchhuah tawh te chu Romelu Lukaku, Paul Pogba, Gonzalo Higuain leh Zinedine Zidane te anni.
Italian international kum 23 a upa hi Aleksander Isak nena Newcastle United player signing to ber anni a, 2022 August thla khan Magpies chuan Swedish striker Isak chu Real Sociedad atangin €70 million in an lo lalut tawh anih kha.
Tonali hian Newcastle a zawm avanga a lawm thu hetiang hian a sawi a, “A hmasa berah chuan ka career chhunzawm zel tura hun tha tak min petu Newcastle United chungah hian lawmthu ka sawi duh a, ka laka an rinna hi inkhelh mualah theihtawpa rulhlet ka tum dawn a ni. St James Park a inkhelh hlan ka nghakhlel tawh takzet a, fans te nena inpawhhona tha tak neih hi ka chak tawh hle.” a ti.
Magpies in pali-na nia season an khar avangin nakkum Champions League an khel dawn a, league lamah chuan an game hmasa berah Aston Villa chu St James Park ah an lo mikhual ang.