Newcastle United boss Eddie Howe chuan loan hmanga Saudi Pro League stars Cristiano Ronaldo ang te an lâkluh theih dan tur a sawifiah.
Newcastle United neitute hi Gulf State Public Investment Fund (PIF) niin Saudi Pro League club pali Al Nassr, Al Ittihad, Al Hilal leh Al Ahli neitute anni bawk a, club hotute indawr dan a zirin heng Saudi club pali star te hian harsa lo tê a Newcastle United zawm theihna dan an nei.
”Saudi stars Ronaldo leh Ruben Neves te hi loan hmanga hawh theih anni em?” tia reporter te zawhna Eddie Howe chuan hetiang hian a chhang, “Theih dan kawng a awm a, amaherawhchu Newcastle United tana thil dik ber anih leh nih loh ah thui tak a innghat. He club ruahmanna leh duhdan a zirin hma kan la ang” a ti.
English manager hian European star tam takin Saudi lam an pan chhanah a ngaihdan hetiang hian a sawi leh a, “Saudi lam hian hlawh tam tak pêk an inhuam thin a, hei hian player te chu anmahni zawm turin a hip lo thei lo a ni” a ti.
Eddie Howe enkawlna hnuaiah Newcastle United in hma an sawn em em a, 2022/23 Premier League season ah palina ni chunga season an khar avangin season tharah UEFA Champions League an khel dawn.
Magpies hian kuminah an squad thawmtha turin Sandro Tonali chu AC Milan atangin £55 million in an lalut fel tawh a, player dang lâkluh erawh tun thlengin an la nei leh lo.
Eddie Howe nau te’n season tharah UEFA Champions League an khel dawn a, sang taka an invawrh theihnan UCL Lalpa an tih mai Cristiano Ronaldo hi loan in an hawh duh mai lo ang maw? Tin, player tha dang Karim Benzema, Ruben Neves, N’Golo Kante leh midang thenkhat te pawh loan a hawh theih mai tur te anni hlawm bawk.