Manchester United chuan nizan khan kumina an pre season game hmasa ber khel in an hmelma club Leeds United chu Norway khawpuiah 2-0 in an hneh a, £60 million a Man Utd zawmtu Mount pawhin a club thar tana a game hmasa ber a khel nghe nghe.
Mount hian nizan khan minute 45 a inlan a, goal leh assist nei lo mahse United midfield lai a luahlum hneh a, Amad Diallo tan chance siamchhuak in heihi first half a chance tha kan hmuh hmasa ber a ni nghe nghe.
Man Utd manager Ten Hag chuan chawlh lawk laiin starting XI pumpui a thlak a, United rawlthar Noam Emeran leh Joe Hugill te chuan second half ah goal khat ve ve khungin Red Devils hi hnehna an chanpui.
Inkhelh banah Ten Hag chuan a player thar Mount chu hetiang hian a fak, “Nuam ti taka a khelh theih hi kan beisei a ni. A theihna kan hrechiang a, team level hi sang zawk ah a hlangkai ngei dawn.”
”Vawiin khan team tan eng thil nge a rawn thlen theih tih chu in hmu thiam mai in ka ring. Mount hi complete midfielder niin Man Utd khelhdan nen a inkhuangrual em em a, kan thil tum te tihlawhtling tur hian min pui thei dawn a ni” a ti.
United hian kuminah Mount chiah an la lalut a, De Gea an chhuahtir avangin goalkeeper thar an lakluh ngei a rinawm bawk. Inter Milan goalkeeper Andre Onana chu tun dinhmuna Man Utd top target a ni a, chutihrualin player man turah club pahnihte an la inrem fel thei mai lo.
United hian Onana an lakluh theih loh chuan Dean Henderson an chhawr a ngai dawn a, Onana an lalut thei hlauh anih erawh chuan Nottingham Forest lamah Henderson chu £20 million vela an kaltir a rinawm.
