Liverpool nena hun engemaw chen sawizawm lo ni tawh Mason Mount chu European club lian pathum dang Arsenal, Manchester United leh Juventus te pawhin an duh niin Athletic chanchinbu chuan a tarlang.
Chelsea academy graduate Mount hian Stamford Bridge ah June 2024 thleng bak contract a nei tawh lova, contract thar chungchangah club lam nen tun thlengin an la inbe rem lo bawk.
Kum 24 a upa hian Chelsea ah kartin £1,50,000 a hlawh mek a, contract thar a ziak dawn anih chuan tuna a hlawh let a tam £3,00.000 chu kartina lakluh a duh. Hei hi Chelsea hotu lam chuan tam lulai an ti deuh ni ngei tur a ni, an player nena an inrem theihloh chhan bulpui ber a ni.
English international Mount hi tun hnai kuma Chelsea player pawimawh ber te zinga mi a ni a, 2021 leh 2022 ah te khan Chelsea Men’s Player of Year lawmman a lo dawng tawh nghe nghe bawk
Tun season ah erawh Mount hian beisei a pha mawlh lova, Blues tan game (all competition) 31 lai inlan tawh mahse goal 3 leh assist vawi 3 chauh a la thawkchhuak a, a team chu league table ah 10-na nih pui mek in champion chu sawi loh season tharah UEFA Champions League an khel phak ang em tih chu zawhna awm a ni.
Chelsea in player beiseiawm tak tak tun season transfer bazar ah an chawlut nual a, manager Graham Potter an player duhthlan tur a nei tha. Chuvangin club a tlatlum lo leh player hlim lo chu an in ui viau pawhin a rinawm lova, Mount pawh hi a thlawna chhuahtir ngawt ai chuan man neiin tun nipui bazar a an hralhchhuah mai pawh a rinawm ta fu mai.
