Manchester United number 7 thar Mason Mount chuan Red Devils legend Cristiano Ronaldo atanga phurna a dawn dan a sawifiah.
England international hian £60 million in Chelsea atangin Manchester United a zawm a, kumin nipui bazara Man Utd player sign hmasak ber ani nghe nghe.
Kum 24 a upa hian Man Utd legend thenkhat Cristiano Ronaldo, David Beckham, Eric Cantona, Bryan Robson leh George Best te hniak hnung zuiin jersey number 7 a ha dawn a, a ko ah mawhphurhna rit tak a tla.
Mount hian 2008 daih tawh a Portsmouth laka Cristiano Ronaldo knuckleball freekick chhuihluh mawi zet mai chu Old Trafford ah mit ngei in a hmu a, hei hian amah ah phurna nasa tak a pêk bakah Ronaldo freekick pet dan hi a zir ve fo bawk.
MUTV kaltlangin Mount chuan Ronaldo freekick chhuihluh mawi zet mai chuan amah ah phurna a pêk thu leh a tihdan a zir thin hetiang hian a sawi, “Kum 10 mi vel lek ka niin ka hria, away fans te awmna tawp lamah ka awm ve ran a, Portsmouth tan tantute zingah tel in khatiang thil thleng danglam bik ka mit ngei a ka hmu thei kha a ropui hle. A tuka training na a Ronaldo freekick pet anga ka petna video pawh kha in hmu ngei in ka ring. Chuvang chuan Old Trafford a khatiang thil ropui ka hmuh khan keimah ah phurna tam tak min pe a, ka hun tawn kha mak ka ti in a ropui hle a, khatiang ang khan he hmunah hian tih ve ngei ka duh a ni.”
English international hlui chuan sawi chhunzawmin, ”Ronaldo atang hian phurna tam tak ka dawng a, a inkhel lai leh a free kick pet te hi ka en duh hle thin. Beckham pawh kha phurna tam tak min petu a ni a, a freekick te leh a chet dan mawlh mai te khan hamhaih takin min siam fo. Chuvang chuan player tam tak atangin phurna kan dawng a, an game khelhdan thenkhat te chu kan game ah chawlut in kan hmang tangkai fo” a ti.
Mount hian nimin lam khan Man Utd player dangte nen pre season training session hmasa ber an zo a, an hlim ho dar dar hle. Red Devils hian pre season tour an neih chhungin Leeds United, Arsenal, Wrexham, Real Madrid leh Borussia Dortmund te an hmachhawn dawn a, August ni 14 ah an league game hmasa ber atan Wolverhampton an hmachhawn bawk ang.