Mason Mount chuan a lo chawrchhuahna Chelsea chhuahsana an hmelma leh elpui ni bawk Manchester United a zawm chhan a sawifiah.
English international transfer chungchangah Man Utd leh Chelsea te hun rei tak chhung an indawr hnuin player manah £55 million + add ons £5 million in an inrem fel a, Mount hian Man Utd ah kum 2028 thleng daih tur contract ziak in tun nipui bazara Man Utd player sign hmasak ber a ni bawk.
Kum 24 a upa hi Chelsea academy graduate niin Stamford Bridge a kum 18 a khawsak hnuah Chelsea a chhuahsan fel a, a club hlui tan hian game 195 khel in goal 35 a khung bawk.
Chelsea fans te ngainat rawn leh Blues player of the year pawh a kum zawna lo dawng tawh Mount hian eng vanga Chelsea chhuahsan nge anih tih MUTV kaltlangin hetiang hian a sawi, “Thla tam tak liamta atang khan Chelsea in hma lam an pan zel na tura an ruahmanna ah hian ka tel tawh lo tih chiang takin a lang a, United in min duh tih ka hriat khan thutlukna fel tak ka siam zui. Club hrawl tak niin player ropui tak tak te lo khelh tawhna a ni a, keipawh chung zinga tel ve chu ka duh a ni. Hma taka inpeih a, pre season tan tura inbuatsaih chhoh tan hi ka thil tum ber a ni mek.”
Mount hi Man Utd chuan jersey number 7 an lo pe a, a team thar tan hian hlawk taka tha thawh a tum.
”Ka inhmuh dan chuan midfielder emaw number 8 role play tur mi ka ni a, a hma lamah tala theihtawpa attack te, chance siam leh goal khung tum te a ni. Chutihrual chuan a tul huna defend a, pressure nasa tak hnuaia awm defender te theitawp chhuaha tanpui hi ka tihtur a ni bawk. Engtiang takin nge team hi kan tanpui theih dawn tih ka hria a, chuvang chuan inkhel muala tih chiah ka hmabak tawh” tiin Mount chuan a sawi bawk.
United hian kumin pre season ah Leeds United, Arsenal, Wrexham, Real Madrid leh Borussia Dortmund te an hmachhawn dawn a, August ni 14 ah an league match hmasa ber turin Wolverhampton an hmachhawn ang.