Nizan Premiere League match Liverpool leh Aston Villa khelhah khan Liverpool chuan 1-0 in hnehna an chang a, Liverpool tana goal khungtu hi Mohamed Salah niin tun season Premiere League khelh mekah goal 14 a khungna chiah a ni.
Aston Villa lakah Mohamed Salah chuan penalty hmangin chakna goal a khung a. Premiere League match 14 chhung teh meuh mai a zawnin, goal emaw assist nei ziah ang a ni. Leiceister City superstar Jamie Vardy record neih a nih rual pui teuh hle. Jamie Vardy hian Premiere League game 15 chhung a zawnin goal emaw assist alo nei ziah tawh a. Salah hian vawi 1 chiahin a phak lo.
Leicester City striker Jamie Vardy’an he record a siam hi kum 2015 August thla atanga December thla inkara a siam a ni.
Nizan inkhelhah khan first half ah goal an khung lo ve ve a, minute 67 naah Tyrone Mings foul vangin Liverpool in penalty an hlawhchhuak a, Mohamed Salah chuan goal-ah a chantir ta a ni.
Liverpool hian unbeaten run an neih belh leh, a zawnin match 17 chhung teh meuh mai Anfield-ah an la tlawm lo. Hetihlai hian Steven Gerrard chuan Aston Villa chu a vawi 2 na atan a tlawm pui.
Mohamed Salah pawh hian record siam chho zelin Premiere League bikah penalty vawi 15 pet tawhin ala pet goal vek a, Premiere League penalty a zawna pet goal tam lamah Matt Le Tissier chiah a aia sang a awm mek. Matt Le Tissier hian a zawnin penalty vawi 23 lai a pet goal a ni.
African Footballer of the Year vawi 2 lai dawng tawhtu Mohamed Salah hi tun season Premier League khelh mekah goal khung tam ber a ni mek a, match 16 a khelh tawh atang goal 14 a khung mek.
Tunah hian Liverpool hi Premiere League table-ah pahnihna dinhmun an hauh mek a, pakhatna dinhmun hauhtu Manchester City chu point 1 chauhvin an pha lo.
Source AF