Liverpool superstar Mohamed Salah chuan Liverpool-ah contract thar sign a duh a, mahse, forward hian kar khatah £500,000 lai mai hlawh a duh niin report in a tarlang.
Mohamed Salah hian kum 2017 khan Roma atang Liverpool a zawm a, Premiere League player tha ber pakhat a rawn ni chho a, Champions League-a Liverpool an champion theihnaah pawh player pawimawh tak pakhat a ni.
Reds tan match 148 inlan tawhin goal 97 lai mai a khung tawh a, vawi 2 lai Golden Boot a dawng tawh a ni. Liverpool player te pawhin kum 29 a upa hi an zinga la awm ve zel turin an duh ngei ang tih chu a chiang.
Liverpool lama Mo Salah contract neih hi kum 2 ala awm a, contract pawhsei ngei pawh a duh.
The Mirror in an tarlan dan chuan Mohamed Salah hian kar khatah £500,000 hlawh a duh a, kum 2 chhung teh meuh mai contract la nei rih mahse, contract dang sign belh a duh niin an sawi. Hei vang hian Liverpool hian an hralh chhuak mai ang tih chu mi tamtak ngaihdan a ni mek.
Club lamin a duh ang hi an remtihpui chuan, Liverpool history bikah player hlawh hnem ber ani ang a, mahse, he thil hi chu a thlen a rinawm vak lo.
Tunah hian karkhatah £200,000 a hlawh mek a, a hlawh hi an tih pun sak duh ang em. Chelsea forward hlui hi Real Madrid leh Paris Saint-Germain lamin a hma atang tawhin lak luh an duh a, tunah pawh hian an la duh a rinawm.
La Liga club lian pahnih FC Barcelona leh Real Madrid hian sum lamah harsatna an tawk nasa a, Kylian Mbappe chu PSG atang lak luh an duh hle. Mahse, Kylian hi an la lut thei rih dawn loh avangin a aiah Salah hi an melh leh zawk niin an sawi.
Summer transfer leh hunah Liverpool hian Salah hi an chelh thei mai ang em?
Source SB