MLS lamah Aubameyang

Chelsea chuan an striker Pierre Emerick Aubameyang chu Major League Soccer Club Los Angeles lama thawn an duh a, a hlawh tur zawng zawng pawh pektlak an inhuam.

Kum 33 a upa hian West London club ah hma hun a nei tawh lo ni maiin a hriat a, UEFA Champions League Round of 16 khel tur squad a a tel loh mai bakah Chelsea game hnuhnung bera Fulham nen an inhnehtawk tumin squad ah a lang lo bawk.

Relovo tarlan danin Chelsea in Aubameyang chu MLS club Los Angeles lama kaltir an duh a, a hlawh tur zawng zawng pawh pektlak an inhuam. Gabon international hian Stamford Bridge ah kartin £160000 a hlawh a ni.

Aubameyang chungchangah Los Angeles leh Chelsea te chuan tunkar Thawhtanni khan inbiakna an nei tawh a, kum 33 a upa hian June thla thleng loan in LAFC hi a zawm phawt ang a, chumi hnuah Chelsea a chhuahsan zui thei ang.

Aubameyang hi Thomas Tuchel lakluh niin Blues tan game 17 a inlan tawh atangin goal 3 chauh a la khung a, Chelsea fans te beisei a pha hlawl lo. January transfer window ah AC Milan leh Atletico Madrid te’n an lakluh theihloh hnuin Aubameyang duhthlan tur awmchhun nia lang chu LAFC a ni ta. MLS transfer window hi April thla laihawl thleng a inhawn dawn avangin Aubameyang tan pawh club thar zawmna hun a la tlai lo ve.

A hunlaia striker hot ber pawl leh tlanchak tak ni thin, European club lian thenkhat Dortmund, Arsenal leh Barcelona tan pawha lo khel tawh hian chuai lam a pan ve ta ni pawhin a lang.